തെരുവുനായ്ക്കളെ പാര്പ്പിക്കാന് സ്ഥലം കണ്ടെത്തല് വലിയ വെല്ലുവിളിയെന്ന് കേരളം സുപ്രിം കോടതിയിൽ
ന്യൂഡൽഹി: തെരുവ് നായ്ക്കളെ പാർപ്പിക്കുന്നതിനുള്ള ഷെൽട്ടറുകൾ ആരംഭിക്കുന്നതിൽ നേരിടുന്ന ഗുരുതര വെല്ലുവിളികൾ സുപ്രീം കോടതിയെ അറിയിച്ച് കേരള സർക്കാർ.
ഷെൽട്ടർ സ്ഥാപിക്കുന്നതിനായി അനുയോജ്യമായ സ്ഥലം കണ്ടെത്തുക എന്നതാണ് ഏറ്റവും വലിയ ബുദ്ധിമുട്ടെന്ന് സംസ്ഥാന സർക്കാർ കോടതിയിൽ വ്യക്തമാക്കി.
ജനകീയ പ്രതിഷേധം വ്യാപകമാണെന്നും, അതിന്റെ പശ്ചാത്തലത്തിൽ എബിസി (ആനിമൽ ബർത്ത് കൺട്രോൾ)
കേന്ദ്രങ്ങൾ പോലും കാര്യക്ഷമമായി പ്രവർത്തിക്കാൻ കഴിയാത്ത അവസ്ഥയാണെന്നും കേരള സർക്കാരിന് വേണ്ടി ചീഫ് സെക്രട്ടറി സുപ്രീം കോടതിയെ അറിയിച്ചു.
തലശ്ശേരിയിൽ ആരംഭിച്ച ഒരു ഡോഗ് ഷെൽട്ടർ ജനങ്ങളുടെ ശക്തമായ പ്രതിഷേധത്തെ തുടർന്ന് അടച്ചുപൂട്ടേണ്ടി വന്ന സംഭവവും സംസ്ഥാനം കോടതിയുടെ ശ്രദ്ധയിൽപ്പെടുത്തി.
കേരളത്തിൽ ജനസാന്ദ്രത വളരെ കൂടുതലായതിനാൽ ഉപയോഗശൂന്യമായ ഭൂമി കണ്ടെത്തുന്നത് വലിയ വെല്ലുവിളിയാണെന്ന് സ്റ്റാൻഡിംഗ് കൗൺസൽ സി.കെ. ശശി മുഖേന സമർപ്പിച്ച സത്യവാങ്മൂലത്തിൽ വ്യക്തമാക്കുന്നു.
നഗര-ഗ്രാമ വ്യത്യാസമില്ലാതെ ഇതേ അവസ്ഥ തന്നെയാണെന്നും സത്യവാങ്മൂലത്തിൽ പറയുന്നു.
തെരുവ് നായ പ്രശ്നം പരിഹരിക്കുന്നതിനായി സംസ്ഥാന സർക്കാർ സ്വീകരിച്ച നടപടികൾ വിശദീകരിച്ചുകൊണ്ടാണ് ചീഫ് സെക്രട്ടറി ഡോ. ജയതിലക് സുപ്രീം കോടതിയിൽ സത്യവാങ്മൂലം ഫയൽ ചെയ്തത്.
നിലവിൽ സംസ്ഥാനത്ത് തെരുവ് നായ്ക്കളെ പാർപ്പിക്കുന്നതിനായി രണ്ട് ഡോഗ് പൗണ്ടുകൾ മാത്രമാണ് പ്രവർത്തിക്കുന്നത്.
കൂടാതെ, തെരുവുനായകൾക്ക് ഭക്ഷണം നൽകുന്നതിനായി 22 ഫീഡിങ് കേന്ദ്രങ്ങൾ ആരംഭിച്ചിട്ടുണ്ടെന്നും, ഇവയുടെ എണ്ണം വർധിപ്പിക്കാൻ ശ്രമങ്ങൾ തുടരുകയാണെന്നും സർക്കാർ കോടതിയെ അറിയിച്ചു.
English Summary
The Kerala government has informed the Supreme Court about the challenges in setting up shelters for stray dogs, citing difficulty in finding suitable land and widespread public protests. The Chief Secretary stated that even Animal Birth Control (ABC) centres are struggling to function, and a dog shelter opened in Thalassery had to be shut down due to public opposition. High population density across both urban and rural areas has made land identification difficult. The state currently operates two dog pounds and 22 feeding centres for stray dogs, with efforts underway to increase their number.
kerala-informs-supreme-court-stray-dog-shelter-challenges
Kerala stray dogs, Supreme Court, dog shelters, animal birth control, ABC centres, public protest, dog pound Kerala, feeding centres
