ശക്തമായ മഴ തുടരും; ഇന്ന് ഏഴ് ജില്ലകളിൽ യെല്ലോ അലർട്ട്
തിരുവനന്തപുരം: സംസ്ഥാനത്ത് ശക്തമായ മഴ തുടരുമെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പ് നൽകി. അടുത്ത അഞ്ച് ദിവസങ്ങളിലും മഴ ശക്തിപ്രാപിക്കുമെന്നാണു പ്രവചനം.
ഇന്ന് ഏഴ് ജില്ലകൾക്ക് യെല്ലോ അലർട്ട് പ്രഖ്യാപിച്ചിട്ടുണ്ട് — കോട്ടയം, ഇടുക്കി, എറണാകുളം, തിരുവനന്തപുരം, കൊല്ലം, പത്തനംതിട്ട, ആലപ്പുഴ.
വടക്കൻ ജില്ലകളിലും ഒറ്റപ്പെട്ടിടങ്ങളിൽ ശക്തമായ മഴയ്ക്കു സാധ്യതയുണ്ടെന്നാണ് മുന്നറിയിപ്പിൽ വ്യക്തമാക്കുന്നത്.
നാളെ തിരുവനന്തപുരം, കൊല്ലം ജില്ലകൾക്കാണ് യെല്ലോ അലർട്ട് തുടരുന്നത്. നവംബർ 26ന് തിരുവനന്തപുരം ജില്ലയിൽ വീണ്ടും യെല്ലോ അലർട്ടുണ്ടാകും.
24 മണിക്കൂറിനിടെ 64.5 മില്ലിമീറ്റർ മുതൽ 115.5 മില്ലിമീറ്റർ വരെ മഴ ലഭിക്കാമെന്ന് കാലാവസ്ഥാ വകുപ്പ് വ്യക്തമാക്കി.
ഉരുൾപൊട്ടലിനും മണ്ണിടിച്ചിലിനും മലവെള്ളപ്പാച്ചിലിനും സാധ്യതയുള്ള പ്രദേശങ്ങളിലെ ജനങ്ങൾ അധികൃതരുടെ നിർദേശങ്ങൾ പാലിച്ച് സുരക്ഷിത ഇടങ്ങളിലേക്ക് മാറി താമസിക്കണം.
കിഴക്കൻ കാറ്റ് വീണ്ടും സജീവമായതിനാൽ ഇടി മിന്നലോടു കൂടിയ ശക്തമായ മഴയ്ക്കും സാധ്യതയുണ്ട്.
കേരള–ലക്ഷദ്വീപ് തീരത്ത് മത്സ്യബന്ധനത്തിന് വിലക്ക് തുടരുന്നു.
ജനങ്ങൾ പരമാവധി ജാഗ്രത പാലിക്കണമെന്നും അധികൃതർ നിർദേശിച്ചു.
English Summary
The India Meteorological Department has warned of heavy rainfall in Kerala over the next five days. A yellow alert is in place today for seven districts — Kottayam, Idukki, Ernakulam, Thiruvananthapuram, Kollam, Pathanamthitta and Alappuzha. Thunderstorms and isolated heavy rainfall are likely as easterly winds strengthen. Landslide-prone regions are advised to remain cautious. A fishing ban continues along the Kerala–Lakshadweep coast.
kerala-heavy-rain-yellow-alert
Kerala, Rain, IMD, Weather Alert, Yellow Alert, Landslide Risk
