തിരുവനന്തപുരം: സംസ്ഥാനത്തെ തീവ്ര വോട്ടർ പട്ടിക പുതുക്കലിന്റെ (SIR) ഭാഗമായുള്ള കരട് വോട്ടർ പട്ടിക പ്രസിദ്ധീകരിച്ചു.
പുതിയ പട്ടിക പ്രകാരം സംസ്ഥാനത്ത് വോട്ടർമാരുടെ എണ്ണത്തിൽ വൻ കുറവാണ് രേഖപ്പെടുത്തിയിരിക്കുന്നത്.
ആകെ 24.08 ലക്ഷം പേർ പട്ടികയിൽ നിന്ന് പുറത്തായതായി മുഖ്യ തെരഞ്ഞെടുപ്പ് ഓഫീസർ രത്തൻ യു. ഖേൽക്കർ അറിയിച്ചു.
പട്ടികയിൽ നിന്ന് ഒഴിവാക്കപ്പെട്ടത് ആരെല്ലാം?
നിലവിലുണ്ടായിരുന്ന 2,78,50,856 വോട്ടർമാരിൽ നിന്ന് കരട് പട്ടിക പ്രസിദ്ധീകരിച്ചപ്പോൾ അത് 2,54,42,352 ആയി കുറഞ്ഞു.
പ്രധാനമായും മൂന്ന് കാരണങ്ങളാലാണ് ആളുകളെ ഒഴിവാക്കിയത്:മരണപ്പെട്ടവർ: 6,49,885 പേർ കണ്ടെത്താനാകാത്തവർ: 6,45,548 പേർ സ്ഥലം മാറിപ്പോയവർ: 8,21,622 പേർ
നിയമസഭാ മണ്ഡലാടിസ്ഥാനത്തിൽ രാഷ്ട്രീയ പാർട്ടികൾക്ക് പട്ടിക കൈമാറാനുള്ള നടപടികൾ ആരംഭിച്ചു കഴിഞ്ഞു.
പേര് പരിശോധിക്കാൻ ഈ വഴികൾ ഉപയോഗിക്കാം
നിങ്ങളുടെ പേര് വോട്ടർ പട്ടികയിൽ ഉണ്ടോ എന്ന് താഴെ പറയുന്ന വെബ്സൈറ്റുകളിലൂടെയോ ആപ്പിലൂടെയോ പരിശോധിക്കാവുന്നതാണ്:ceo.kerala.gov.in (Voters’ Corner സന്ദർശിക്കുക) voters.eci.gov.in , Voters Helpline (ECI മൊബൈൽ ആപ്പ്)
പേര് ചേർക്കാൻ ഇനിയും അവസരം
പട്ടികയിൽ നിന്ന് ഒഴിവാക്കപ്പെട്ടവർക്കോ പുതുതായി പേര് ചേർക്കാൻ ആഗ്രഹിക്കുന്നവർക്കോ ഇനിയും അവസരമുണ്ട്. ജനുവരി 22 വരെ പരാതികളും അപേക്ഷകളും സമർപ്പിക്കാം.
പുതിയ വോട്ടർമാർ: ഫോം 6 പൂരിപ്പിക്കണം.പ്രവാസികൾ: ഫോം 6A പൂരിപ്പിച്ചു നൽകണം.
ഇതിനോടൊപ്പം നിശ്ചിത സത്യവാങ്മൂലവും സമർപ്പിക്കേണ്ടതുണ്ട്. ബി.എൽ.ഒ (BLO) മാരെ നേരിട്ട് കണ്ടും അപേക്ഷകൾ നൽകാവുന്നതാണ്.
ഹിയറിംഗിന് ശേഷവും പരാതികളുണ്ടെങ്കിൽ 15 ദിവസത്തിനകം ജില്ലാ കളക്ടർക്കും,
തുടർന്ന് 30 ദിവസത്തിനകം ചീഫ് ഇലക്ടറൽ ഓഫീസർക്കും അപ്പീൽ നൽകാൻ സാധിക്കുമെന്നും അദ്ദേഹം വ്യക്തമാക്കി.
ജാഗ്രത പാലിക്കാം; വോട്ടവകാശം ഉറപ്പാക്കാം
കരട് വോട്ടർ പട്ടികയിൽ നിന്ന് വൻതോതിൽ പേരുകൾ ഒഴിവാക്കപ്പെട്ട സാഹചര്യത്തിൽ വോട്ടർമാർ അതീവ ജാഗ്രത പാലിക്കണമെന്ന് മുഖ്യ തെരഞ്ഞെടുപ്പ് ഓഫീസർ നിർദ്ദേശിച്ചു.
സാങ്കേതികമായ പിഴവുകൾ മൂലമോ താമസം മാറിയത് മൂലമോ അർഹരായവർ പട്ടികയിൽ നിന്ന് പുറത്തായിട്ടുണ്ടെങ്കിൽ അത് പരിഹരിക്കാൻ ഈ ഒരു മാസത്തെ സമയം പ്രയോജനപ്പെടുത്തണം.
ജനാധിപത്യ പ്രക്രിയയിൽ വോട്ടവകാശം വിനിയോഗിക്കാൻ ഓരോ പൗരനും പട്ടികയിൽ പേരുണ്ടെന്ന് ഉറപ്പുവരുത്തേണ്ടത് അനിവാര്യമാണ്.
English Summary
The Chief Electoral Officer of Kerala, Rathan U Kelkar, has released the draft voter list as part of the Special Intensive Revision (SIR). A significant reduction is seen as 24.08 lakh names were removed from the previous list of 2.78 crore voters. The exclusions include deceased individuals, untraceable voters, and those who have permanently shifted.
