രാഹുല് മാങ്കൂട്ടത്തിലിനെതിരെ കേസെടുത്ത് ക്രൈംബ്രാഞ്ച്
തിരുവനന്തപുരം: പാലക്കാട് എംഎല്എ രാഹുല് മാങ്കൂട്ടത്തിലിന് എതിരെ ക്രൈംബ്രാഞ്ച് കേസെടുത്തു. സ്ത്രീകളോട് മോശമായി പെരുമാറിയെന്ന് ചൂണ്ടിക്കാട്ടിയാണ് കേസ് രജിസ്റ്റർ ചെയ്തത്.
സ്ത്രീകളെ ശല്യം ചെയ്തത് ഉള്പ്പെടെയുള്ള വകുപ്പുകള് പ്രകാരം ആണ് കേസെടുത്തിരിക്കുന്നത്. വിഷയത്തില് പൊലീസ് നിയമോപദേശം തേടിയെന്ന റിപ്പോര്ട്ടുകള്ക്ക് പിന്നാലെ ക്രൈം ബ്രാഞ്ച് സ്വമേധയ നടപടി സ്വീകരിക്കുകയായിരുന്നു.
യുവതിയെ നിര്ബന്ധിച്ച് ഗര്ഭച്ഛിദ്രം നടത്തിയെന്ന ആരോപണത്തില് ഉള്പ്പെടെ നിലവില് പൊലീസ്, ബാലാവകാശ കമ്മീഷന്, വനിത കമ്മീഷന് എന്നിവയില് പരാതി സമര്പ്പിക്കപ്പെട്ട സാഹചര്യത്തില് ആയിരുന്നു പൊലീസ് നിയമോപദേശം തേടിയത്. തുടർന്ന് കേസ് ഉള്പ്പെടെ എടുത്ത് മുന്നോട്ട് പോകാനായിരുന്നു സംസ്ഥാന പൊലീസ് മേധാവിയുടെ നിര്ദേശം.
നിലവില് രാഹുലിന് എതിരായി ഒന്നിലധികം വെളിപ്പെടുത്തലുകള് പുറത്തുവന്നിരുന്നെങ്കിലും പരാതികള് ഒന്നും രജിസ്റ്റര് ചെയ്തിരുന്നില്ല. ഈ സാഹചര്യത്തില് നിയമ നടപടിയിലേക്ക് പോകാന് കഴിയില്ലെന്ന നിലപാടായിരുന്നു പൊലീസ് സ്വീകരിച്ചിരുന്നത്.
എന്നാല്, ഇപ്പോൾ രാഹുല് മാങ്കൂട്ടത്തിലിന് എതിരെ മുഖ്യമന്ത്രി പിണറായി വിജയന് ഉള്പ്പെടെ നിലപാട് ശക്തമാക്കിയ സാഹചര്യത്തിലാണ് നീക്കം.
രാഹുല് മാങ്കൂട്ടത്തിലിന് ക്രൈംബ്രാഞ്ച് നോട്ടീസ്
തിരുവനന്തപുരം: ആരോപണവിധേയനായ രാഹുല് മാങ്കൂട്ടത്തില് എംഎല്എയ്ക്ക് നോട്ടീസ് നല്കി ക്രൈംബ്രാഞ്ച്. വ്യാജ തിരിച്ചറിയല് കാര്ഡ് കേസില് ചോദ്യം ചെയ്യുന്നതിനാണ് നോട്ടീസ് നൽകിയത്. ശനിയാഴ്ച ഹാജരാകാനാണ് നിർദേശം.
യൂത്ത് കോണ്ഗ്രസ് സംസ്ഥാന അധ്യക്ഷ തെരഞ്ഞെടുപ്പിനായി വ്യാജ തിരിച്ചറിയല് കാര്ഡ് ഉണ്ടാക്കിയെന്നത് ഏറെ വിവാദമായ സംഭവമായിരുന്നു. ഇതിൽ തിരുവനന്തപുരം മ്യൂസിയം പൊലീസ് ആണ് കേസെടുത്ത് അന്വേഷണം ആരംഭിച്ചത്.
മ്യൂസിയം പൊലീസ് രാഹുലിനെ വിളിച്ചു വരുത്തി ചോദ്യം ചെയ്യുകയും ചെയ്തിരുന്നു. എന്നാല് വ്യാജ തിരിച്ചറിയല് കാര്ഡുമായി രാഹുലിന് നേരിട്ട് ബന്ധപ്പെടുത്താനുള്ള തെളിവ് ലഭിച്ചില്ലെന്നാണ് പൊലീസ് കണ്ടെത്തൽ.
കേസിൽ രാഹുലുമായി അടുത്ത ബന്ധമുള്ള ചില കൂട്ടാളികളെ അന്ന് പൊലീസ് അറസ്റ്റ് ചെയ്തിരുന്നു. പ്രതികളുടെ ഫോണ് വിദഗ്ധ പരിശോധനയ്ക്കായി അയക്കുകയും ചെയ്തു.
കേസിലെ മൂന്നാം പ്രതിയുടെ ഫോണിലുള്ള ശബ്ദ സന്ദേശത്തില് രാഹുല് മാങ്കൂട്ടത്തിലിനെപ്പറ്റിയുള്ള പരാമര്ശം അടങ്ങിയത് പോലീസ് വീണ്ടെടുത്തിരുന്നു.
ഇക്കാര്യത്തില് വ്യക്തത വരുത്തുന്നതിനാണ് ക്രൈംബ്രാഞ്ച് രാഹുല് മാങ്കൂട്ടത്തിലിനെ ചോദ്യം ചെയ്യുന്നതിനായി വിളിച്ചു വരുത്തുന്നത്.
Summary: Kerala Crime Branch has filed a case against Palakkad MLA Rahul Mankootathil for alleged misconduct and harassment of women. The case has triggered political controversy in Kerala.
