കേരള കോൺഗ്രസ് എം സ്ഥാനാർഥി പട്ടിക പ്രഖ്യാപിച്ചു; പാലയിൽ വീണ്ടും ജോസ് കെ. മാണി, പെരുമ്പാവൂരിൽ ബേസിൽ പോൾ
കോട്ടയം/കൊച്ചി: വരുന്ന നിയമസഭാ തിരഞ്ഞെടുപ്പിനോടനുബന്ധിച്ച് കേരള കോൺഗ്രസ് (എം) സ്ഥാനാർഥി പട്ടിക പ്രഖ്യാപിച്ചു. പാർട്ടി ചെയർമാനും മുൻ മന്ത്രിയുമായ ജോസ് കെ. മാണി വീണ്ടും പാലാ മണ്ഡലത്തിൽ നിന്ന് ജനവിധി തേടും.
കടുത്തുരുത്തിയിൽ കോട്ടയം ജില്ലാ പഞ്ചായത്ത് മുൻ പ്രസിഡന്റ് നിർമല ജിമ്മിയാണ് പാർട്ടിയുടെ സ്ഥാനാർഥി. ഇവിടെ നിഷാ ജോസ് കെ. മാണി മത്സരിക്കുമെന്ന അഭ്യൂഹങ്ങൾ ഉണ്ടായിരുന്നെങ്കിലും പട്ടികയിൽ അവരുടെ പേര് ഉൾപ്പെട്ടിട്ടില്ല.
പാലയും കടുത്തുരുത്തിയും ഉൾപ്പെടെ പാർട്ടി മത്സരിക്കുന്ന 12 മണ്ഡലങ്ങളിലേക്കുള്ള സ്ഥാനാർഥികളെയാണ് പ്രഖ്യാപിച്ചത്. പെരുമ്പാവൂരിൽ ബേസിൽ പോളിനെ സ്ഥാനാർഥിയായി പ്രഖ്യാപിച്ചതും ശ്രദ്ധേയമായി.
കോൺഗ്രസ് നേതാവും എറണാകുളം ഡിസിസി സെക്രട്ടറിയുമായ ബേസിൽ പോൾ ഇടതുമുന്നണി സ്ഥാനാർഥിയായി മത്സരിക്കുമെന്ന വാർത്ത നേരത്തെ തന്നെ രാഷ്ട്രീയ രംഗത്ത് ചർച്ചയായിരുന്നുവെന്ന് റിപ്പോർട്ടുകൾ പറയുന്നു. കേരള കോൺഗ്രസ് (എം) സ്ഥാനാർഥിയായിട്ടായിരിക്കും ബേസിൽ പോൾ മത്സരിക്കുകയെന്ന സൂചനയും രാഷ്ട്രീയ വൃത്തങ്ങളിൽ നിന്നുണ്ടായിരുന്നു.
മാസങ്ങൾക്കുമുമ്പ് തന്നെ ഇടതുമുന്നണി നേതൃത്വവുമായി ഈ വിഷയത്തിൽ ചർച്ച നടത്തി ധാരണയിലെത്തിയതായും റിപ്പോർട്ടുകളുണ്ട്. കഴിഞ്ഞ ദിവസം ബേസിൽ പോൾ കേരള കോൺഗ്രസ് (എം) ചെയർമാൻ ജോസ് കെ. മാണിയെ നേരിൽ കണ്ടു ചർച്ച നടത്തിയിരുന്നു.
കൂവപ്പടി ബ്ലോക്ക് പഞ്ചായത്ത് മുൻ പ്രസിഡന്റായ ബേസിൽ പോൾ പ്രാദേശിക രാഷ്ട്രീയത്തിൽ സജീവ സാന്നിധ്യമാണ്. എറണാകുളം ജില്ലാ പഞ്ചായത്ത് അംഗമായും അദ്ദേഹം പ്രവർത്തിച്ചിട്ടുണ്ട്.
ഇതിനിടെ പെരുമ്പാവൂരിൽ കോൺഗ്രസിന്റെയും എൻഡിഎയുടെയും സ്ഥാനാർഥികളെക്കുറിച്ചുള്ള അന്തിമ തീരുമാനം ഇനിയും പുറത്തുവന്നിട്ടില്ല. സിറ്റിംഗ് എംഎൽഎയായ എൽദോസ് കുന്നപ്പിള്ളി വീണ്ടും കോൺഗ്രസ് സ്ഥാനാർഥിയായേക്കുമെന്ന സൂചനകളും ലഭിക്കുന്നുണ്ട്.
കേരള കോൺഗ്രസ് (എം) സ്ഥാനാർഥികൾ
പാലാ – ജോസ് കെ. മാണി
ഇടുക്കി – റോഷി ഓഗസ്റ്റിൻ
കാഞ്ഞിരപ്പള്ളി – എൻ. ജയരാജ്
ചങ്ങനാശ്ശേരി – ജോബ് മൈക്കൽ
പൂഞ്ഞാർ – സെബാസ്റ്റ്യൻ കുളത്തുങ്കൽ
ചാലക്കുടി – ബിജു ചിറയത്ത്
റാന്നി – പ്രമോദ് നാരായൺ
തൊടുപുഴ – സിറിൽ ചാഴിക്കാടൻ
പിറവം – സാബു കെ. ജേക്കബ്
ഇരിക്കൂർ – മാത്യു കുഴൽനാടൻ
കടുത്തുരുത്തി – നിർമല ജിമ്മി
പെരുമ്പാവൂർ – ബേസിൽ പോൾ
English Summary
Kerala Congress (M) has announced its candidates for the 2026 Kerala Assembly elections. Party chairman Jose K. Mani will contest again from Pala. Nirmala Jimmy will contest from Kaduthuruthy, ending speculation that Nisha Jose K. Mani would be the candidate there. The party released a list of candidates for 12 constituencies across Kerala.
