തിരുവനന്തപുരം: കേരളത്തിലെ ഇലക്ട്രിക്കൽ എഞ്ചിനീയറിംഗ് മേഖലയിൽ വിപ്ലവകരമായ മാറ്റത്തിനൊരുങ്ങി സംസ്ഥാന സർക്കാർ.
സംസ്ഥാന ഇലക്ട്രിക്കൽ ഇൻസ്പെക്ടറേറ്റ് വകുപ്പ് ആദ്യമായി ‘ചാർട്ടേഡ് ഇലക്ട്രിക്കൽ സേഫ്റ്റി എഞ്ചിനീയർമാരെ‘ തെരഞ്ഞെടുക്കുന്നതിനുള്ള ഔദ്യോഗിക വിജ്ഞാപനം പുറപ്പെടുവിച്ചു.
വൈദ്യുത സുരക്ഷാ പരിശോധനകളിൽ സ്വയം സാക്ഷ്യപ്പെടുത്തൽ (Self-Certification) നടത്തുന്നതിന് എഞ്ചിനീയർമാർക്ക് അധികാരം നൽകുന്ന ഈ പദവിയിലേക്ക് അപേക്ഷകൾ ക്ഷണിച്ചു കഴിഞ്ഞു.
എന്താണ് ചാർട്ടേഡ് ഇലക്ട്രിക്കൽ സേഫ്റ്റി എഞ്ചിനീയർ പദവി? ആർക്കൊക്കെ ഈ സുവർണ്ണാവസരം പ്രയോജനപ്പെടുത്താം?
ഇലക്ട്രിസിറ്റി ആക്ട് 2003 പ്രകാരം വൈദ്യുത പ്രതിഷ്ഠാപനങ്ങളുടെ ഉടമസ്ഥർക്കോ ഉപഭോക്താക്കൾക്കോ
തങ്ങളുടെ സ്ഥാപനങ്ങളിലെ സുരക്ഷാ മാനദണ്ഡങ്ങൾ പരിശോധിച്ച് ഉറപ്പുവരുത്താൻ കേന്ദ്ര ഇലക്ട്രിസിറ്റി അതോറിറ്റി വിഭാവനം ചെയ്ത തസ്തികയാണിത്.
പരീക്ഷയിലൂടെ തിരഞ്ഞെടുക്കപ്പെടുന്നവർക്ക് നിശ്ചിത വോൾട്ടേജ് വരെയുള്ള സർട്ടിഫിക്കേഷനുകൾ നൽകാൻ അധികാരമുണ്ടാകും.
ഒരു സ്വതന്ത്ര പ്രൊഫഷണൽ എന്ന നിലയിൽ മികച്ച വരുമാനവും അംഗീകാരവും ലഭിക്കുന്ന മേഖലയാണിത്.
ബിരുദധാരികൾക്കും ഡിപ്ലോമക്കാർക്കും അപേക്ഷിക്കാം; പ്രവൃത്തിപരിചയവും പ്രായപരിധിയും സംബന്ധിച്ച കർശന നിബന്ധനകൾ ഇങ്ങനെ
അംഗീകൃത സ്ഥാപനങ്ങളിൽ നിന്നുള്ള ഇലക്ട്രിക്കൽ എഞ്ചിനീയറിംഗ് ബിരുദമുള്ളവർക്ക് അഞ്ച് വർഷത്തെ പ്രവൃത്തിപരിചയവും,
ഡിപ്ലോമക്കാർക്ക് പത്ത് വർഷത്തെ പ്രവൃത്തിപരിചയവും നിർബന്ധമാണ്.
വൈദ്യുത നിയമങ്ങൾ, ഇന്ത്യൻ സ്റ്റാൻഡേർഡുകൾ എന്നിവയിൽ അറിവുണ്ടായിരിക്കണം.
അപേക്ഷകർക്ക് 25 വയസ്സ് പൂർത്തിയായിരിക്കണം, എന്നാൽ 65 വയസ്സ് കവിയാൻ പാടില്ല എന്നത് മുതിർന്ന വിദഗ്ധർക്കും ഈ മേഖലയിലേക്ക് വരാൻ അവസരമൊരുക്കുന്നു.
ബി.ജെ.പി വാക്ക് പാലിച്ചപ്പോൾ… കല്ലൂർക്കാട്ടെ സാലിയുടെ കണ്ണുനിറഞ്ഞ ദിവസം
അപേക്ഷാ ഫീസ് എവിടെ അടയ്ക്കണം? പരീക്ഷാ തീയതിയും രജിസ്ട്രേഷൻ നടപടികളും സംബന്ധിച്ച വിശദവിവരങ്ങൾ
താൽപ്പര്യമുള്ള ഉദ്യോഗാർത്ഥികൾ 500 രൂപ പരീക്ഷാ ഫീസ് കേരളത്തിലെ ഏതെങ്കിലും ഗവൺമെന്റ് ട്രഷറിയിലോ ജനസേവന കേന്ദ്രത്തിലോ ‘0043-00-102-99-02‘ എന്ന ശീർഷകത്തിൽ അടയ്ക്കേണ്ടതാണ്.
പരീക്ഷയിൽ വിജയിക്കുന്നവർ 10,000 രൂപ രജിസ്ട്രേഷൻ ഫീസ് അടയ്ക്കുന്നതോടെ പത്ത് വർഷം കാലാവധിയുള്ള ഔദ്യോഗിക സർട്ടിഫിക്കറ്റ് ലഭിക്കും.
മാർച്ച് 20 ആണ് അപേക്ഷ സ്വീകരിക്കുന്ന അവസാന തീയതി.
ശ്രദ്ധിക്കുക! ഈ നിബന്ധനകൾ പാലിക്കാത്തവരുടെ അപേക്ഷകൾ നിരസിക്കപ്പെടാൻ സാധ്യതയുണ്ട്
അപേക്ഷകർ നിർബന്ധമായും കേരളത്തിലെ സ്ഥിരതാമസക്കാരായിരിക്കണം. വിദേശ രാജ്യങ്ങളിൽ നിന്നുള്ള പ്രവൃത്തിപരിചയം ഈ പരീക്ഷയ്ക്കായി പരിഗണിക്കുന്നതല്ല.
നിലവിൽ സർക്കാർ, അർദ്ധ സർക്കാർ അല്ലെങ്കിൽ പൊതുമേഖലാ സ്ഥാപനങ്ങളിൽ ജോലി ചെയ്യുന്നവർക്കും,
സജീവമായ ഇലക്ട്രിക്കൽ കോൺട്രാക്ടർ ലൈസൻസ് ഉള്ളവർക്കും അപേക്ഷിക്കാൻ അർഹതയില്ല. എന്നാൽ കോൺട്രാക്ടർ ലൈസൻസ് സറണ്ടർ ചെയ്തവർക്ക് അപേക്ഷിക്കാവുന്നതാണ്.
കൂടുതൽ വിവരങ്ങൾക്കും അപേക്ഷാ ഫോമിനും www.dei.kerala.gov.in എന്ന വെബ്സൈറ്റ് സന്ദർശിക്കുകയോ 0471-2330558 എന്ന നമ്പറിൽ ബന്ധപ്പെടുകയോ ചെയ്യാം.
