നടിയെ നിർമാതാവായ ഭർത്താവ് തട്ടിക്കൊണ്ടുപോയി; ആവശ്യപ്പെട്ടത് ഒരുവയസുള്ള മകളെ
കന്നഡ നടിയായ ചൈത്ര ആർനെയെ ഭർത്താവ് തട്ടിക്കൊണ്ടുപോയതായി പരാതി. സംഭവത്തിൽ ചൈത്രയുടെ സഹോദരി ലീല ആർ പൊലീസിൽ പരാതി നൽകി.
ഒരു വയസ്സുള്ള മകളുടെ കസ്റ്റഡിയെച്ചൊല്ലിയുള്ള തർക്കമാണ് തട്ടിക്കൊണ്ടുപോകലിന് പിന്നിലെന്നാണ് പൊലീസിന് ലഭിച്ച പ്രാഥമിക വിവരം.
ചൈത്രയുടെ ഭർത്താവ് ഹർഷവർദ്ധൻ, ചലച്ചിത്ര നിർമ്മാതാവും വർദ്ധൻ എന്റർപ്രൈസസിന്റെ ഉടമയുമാണ്. 2023ലാണ് ഇരുവരുടെയും വിവാഹം നടന്നത്.
എന്നാൽ, കഴിഞ്ഞ ഏകദേശം എട്ട് മാസമായി ഇരുവരും വേർപിരിഞ്ഞാണ് താമസം. ചൈത്ര മകളോടൊപ്പം ബെംഗളൂരുവിലെ മഗാഡി റോഡിലെ വാടക വീട്ടിലാണു താമസം. ഹർഷവർദ്ധൻ ഹാസനിലാണ് താമസിക്കുന്നത്.
ഡിസംബർ 7ന് ഷൂട്ടിങ്ങിനായി മൈസൂരുവിലേക്ക് പോകുന്നുവെന്ന് ചൈത്ര കുടുംബത്തെ അറിയിച്ചിരുന്നു. എന്നാൽ ഇത് ഹർഷവർദ്ധൻ മുൻകൂട്ടി ആസൂത്രണം ചെയ്ത പദ്ധതിയുടെ ഭാഗമായിരുന്നുവെന്നാണ് പരാതി.
ഹർഷവർദ്ധന്റെ കൂട്ടാളിയായ കൗഷിക് മറ്റൊരാളുടെ സഹായത്തോടെ ചൈത്രയെ മൈസൂരു റോഡ് മെട്രോ സ്റ്റേഷനിലേക്ക് വിളിച്ചുവരുത്തി കാറിൽ ബലമായി കയറ്റി തട്ടിക്കൊണ്ടുപോയെന്നാണ് ആരോപണം.
തട്ടിക്കൊണ്ടുപോകപ്പെട്ട വിവരം ചൈത്ര പിന്നീട് ഒരു സുഹൃത്തിന് ഫോൺ ചെയ്ത് അറിയിച്ചു. സുഹൃത്ത് ഉടൻ തന്നെ ചൈത്രയുടെ കുടുംബത്തെ വിവരം അറിയിക്കുകയായിരുന്നു.
പിന്നാലെ, ഹർഷവർദ്ധൻ ചൈത്രയുടെ അമ്മ സിദ്ധമ്മയെ വിളിച്ച് തട്ടിക്കൊണ്ടുപോയ വിവരം സമ്മതിക്കുകയും, കുഞ്ഞിനെ ആവശ്യപ്പെട്ട സ്ഥലത്ത് എത്തിച്ചാൽ മാത്രമേ ചൈത്രയെ വിട്ടയക്കൂ എന്നും അറിയിക്കുകയും ചെയ്തു.
പിന്നീട് മറ്റൊരു ബന്ധുവിനെ വിളിച്ച് കുട്ടിയെ അർസിക്കെരെയിൽ എത്തിക്കാൻ ആവശ്യപ്പെട്ടതായും, ചൈത്രയെ സുരക്ഷിതമായി വിട്ടയക്കാമെന്ന് ഉറപ്പുനൽകിയതായും പരാതിയിൽ പറയുന്നു.
ഇതോടെ ബന്ധുക്കൾ പൊലീസിനെ വിവരം അറിയിക്കുകയും, ലീല ആർ നൽകിയ പരാതിയുടെ അടിസ്ഥാനത്തിൽ പൊലീസ് കേസ് രജിസ്റ്റർ ചെയ്യുകയും ചെയ്തു.
English Summary
A complaint has been filed alleging that Kannada actress Chaitra Arne was abducted by her husband following a dispute over the custody of their one-year-old daughter.
The complaint was lodged by her sister, Leela R.
According to the complaint, Chaitra’s husband, film producer Harshavardhan, allegedly planned the abduction with the help of an associate after luring her to a metro station. He later admitted the act to Chaitra’s mother and demanded the child be brought to a specified location in exchange for Chaitra’s release. Police have registered a case and are investigating the incident.
kannada-actress-chaitra-arne-abduction-complaint
Chaitra Arne, Kannada cinema, abduction case, custody dispute, Harshavardhan, Bengaluru, Mysuru, police complaint
