മലപ്പുറം: വടക്കൻ കേരളത്തിന്റെ വ്യാവസായിക ഭൂപടത്തിൽ പുതിയ ചരിത്രം കുറിച്ചുകൊണ്ട്
കാക്കഞ്ചേരി കിൻഫ്ര ടെക്നോ പാർക്കിൽ അത്യാധുനിക സൗകര്യങ്ങളോടെയുള്ള ഗ്ലോബൽ കേപ്പബിലിറ്റി സെന്റർ (GCC) പ്രവർത്തനമാരംഭിച്ചു.
യുഎഇ ആസ്ഥാനമായുള്ള പ്രമുഖ നിക്ഷേപക ഗ്രൂപ്പായ എം.എസ്. ഹോൾഡിഗ്സാണ് ഈ വിപ്ലവകരമായ സംരംഭത്തിന് പിന്നിൽ.
മലപ്പുറം ജില്ലയുടെയും വടക്കൻ കേരളത്തിന്റെയും സാങ്കേതിക മുന്നേറ്റത്തിൽ ഈ കേന്ദ്രം നിർണ്ണായക പങ്കുവഹിക്കും.
സംസ്ഥാനത്തെ യുവാക്കൾക്ക് സ്വന്തം നാട്ടിൽ അന്താരാഷ്ട്ര കരിയർ ഉറപ്പാക്കാൻ ഈ സംരംഭം വഴിതുറക്കുമെന്ന് മന്ത്രി വി. അബ്ദുറഹ്മാൻ
കാക്കഞ്ചേരിയിൽ നടന്ന പ്രൗഢഗംഭീരമായ ചടങ്ങിൽ കായിക വകുപ്പ് മന്ത്രി വി. അബ്ദുറഹ്മാനാണ് കേന്ദ്രത്തിന്റെ ഔദ്യോഗിക ഉദ്ഘാടനം നിർവഹിച്ചത്.
ഉന്നത വിദ്യാഭ്യാസം നേടിയ കേരളത്തിലെ യുവജനങ്ങൾക്ക് മികച്ച തൊഴിലിനായി വിദേശരാജ്യങ്ങളെയോ മറ്റ് സംസ്ഥാനങ്ങളെയോ ആശ്രയിക്കേണ്ടി വരുന്ന സാഹചര്യം മാറണമെന്നും,
ഇത്തരം ആഗോള കേന്ദ്രങ്ങൾ സ്വന്തം നാട്ടിൽ വരുന്നത് വഴി അന്താരാഷ്ട്ര നിലവാരമുള്ള തൊഴിലവസരങ്ങൾ വീട്ടുപടിക്കൽ എത്തുമെന്നും മന്ത്രി പറഞ്ഞു.
കേരളത്തിലെ സുരക്ഷിതമായ വ്യാവസായ അന്തരീക്ഷവും മിടുക്കരായ ഉദ്യോഗാർത്ഥികളും ആഗോള കമ്പനികൾക്ക് മികച്ച നിക്ഷേപ സാധ്യതയാണ് ഒരുക്കുന്നതെന്നും അദ്ദേഹം കൂട്ടിചേർത്തു.
സാങ്കേതികവിദ്യയും ധനകാര്യ ഗവേഷണവും ഒത്തുചേരുന്ന എം.എസ്. ഹോൾഡിഗ്സിന്റെ ആഗോള പ്രവർത്തനങ്ങളുടെ സിരാകേന്ദ്രം
സാധാരണ ഐടി പാർക്കുകളിൽ നിന്നും വ്യത്യസ്തമായി, ഒരു കമ്പനിയുടെ ആഗോള ബിസിനസ് പ്രവർത്തനങ്ങൾ ഒരിടത്ത് കേന്ദ്രീകരിക്കുന്ന രീതിയിലാണ് ഈ ജിസിസി സജ്ജമാക്കിയിരിക്കുന്നത്.
എം.എസ്. ഹോൾഡിഗ്സിന്റെ ലോകമെമ്പാടുമുള്ള ബിസിനസ് ശൃംഖലകൾക്കാവശ്യമായ സാങ്കേതിക സഹായം,
ഫിനാൻഷ്യൽ റിസർച്ച്, റിസർച്ച് ആൻഡ് ഡെവലപ്മെന്റ് (R&D) എന്നിവ ഈ സെന്ററിലൂടെയാകും നിയന്ത്രിക്കപ്പെടുക.
ലോകത്തിന്റെ ഏത് കോണിലുള്ള ബിസിനസ് ആവശ്യങ്ങൾക്കും കാക്കഞ്ചേരിയിൽ ഇരിക്കുന്ന
പ്രൊഫഷണലുകൾ പരിഹാരം കാണുന്ന രീതിയിലാണ് ഇതിന്റെ പ്രവർത്തനം ക്രമീകരിച്ചിരിക്കുന്നത്.
അഞ്ച് വർഷത്തിനുള്ളിൽ രണ്ടായിരത്തിലധികം നേരിട്ടുള്ള തൊഴിലവസരങ്ങൾ സൃഷ്ടിക്കാനുള്ള ബൃഹദ് പദ്ധതികളുമായി അധികൃതർ
തുടക്കത്തിൽ നൂറോളം പേർക്ക് ജോലി നൽകിക്കൊണ്ടാണ് കേന്ദ്രം പ്രവർത്തനം ആരംഭിച്ചിരിക്കുന്നത്.
എന്നാൽ വരും വർഷങ്ങളിൽ പ്രവർത്തനങ്ങൾ വിപുലീകരിക്കുന്നതോടെ നേരിട്ട് 2,000 പേർക്കും പരോക്ഷമായി അയ്യായിരത്തോളം പേർക്കും തൊഴിൽ നൽകാനാണ് കമ്പനി ലക്ഷ്യമിടുന്നത്.
കേരളത്തെ ലോകോത്തര സേവന കേന്ദ്രമായി (Global Service Hub) മാറ്റുകയാണ് തങ്ങളുടെ ലക്ഷ്യമെന്ന് എം.എസ് ഹോൾഡിഗ്സ് സ്ഥാപകനും സിഇഒയുമായ മുഹമ്മദ് ഷഫീക്ക് വ്യക്തമാക്കി.
പ്രാദേശികമായ കഴിവുകളെ അന്താരാഷ്ട്ര നിലവാരത്തിലേക്ക് ഉയർത്താൻ പ്രത്യേക പരിശീലന പരിപാടികളും ഇതിനോടൊപ്പം നടപ്പിലാക്കും.
English Summary
The first Global Capability Center (GCC) in Northern Kerala has been inaugurated at Kakkanchery Kinfra Techno Park by Minister V. Abdurahiman. Established by UAE-based MS Holdings, the center focuses on technology and financial research. It aims to scale from 100 employees to 2,000 within five years, transforming Kerala into a global service hub.
