സമൂഹമാധ്യമത്തിലൂടെ വിമര്‍ശിക്കാനെത്തിയ ആളുകള്‍ക്ക് തക്ക മറുപടി നല്‍കി നടി സാധിക വേണുഗോപാല്‍. പുതിയ ചിത്രത്തിലെ കഥാപാത്രത്തിനു വേണ്ടി മേക്കപ്പ് ചെയ്യുന്ന വിഡിയോ താരം പങ്കുവച്ചിരുന്നു. ”മേക്കപ്പ് ചെയ്ത് തന്നെ കരിവാരി തേക്കുന്നത് നിങ്ങളെ കാണിച്ചുതരാം” എന്ന് സാധിക പറയുന്നുണ്ട്. ആദിവാസി പെണ്‍കുട്ടിയുടെ വേഷത്തിലാണ് സാധികയെ വീഡിയോയില്‍ കാണാനാകുക. ഈ പോസ്റ്റിലാണ് ചിലര്‍ വിമര്‍ശനങ്ങളുമായി എത്തിയത്.
‘ഇത്തിരി തൊലി വെളുത്തതാണെന്നുള്ള അഹങ്കാരം ഉണ്ടല്ലേ’ എന്നായിരുന്നു ഒരു കമന്റ്. ”തൊലി വെളുത്തതാണെന്ന് ചേട്ടന് തോന്നുന്നെങ്കില്‍ ചേട്ടന്റെ കണ്ണിന്റെ നന്മയും സൗന്ദര്യവും ആണ്, നന്ദി.” എന്നായിരുന്നു താരം നല്‍കിയ മറുപടി.
ഈ വീഡിയോ എടുത്ത് മറ്റുള്ളവരെ കാണിക്കുന്നത് വളരെ മോശമാണെന്നും നടിയുടെ ഉദ്ദേശ്യം എന്തെന്ന് മനസ്സിലാകുന്നില്ലെന്നുമായിരുന്നു മറ്റൊരു വിമര്‍ശനം. ഇതിനും നടി കൃത്യമായ മറുപടി നല്‍കി. ”പ്രമോഷന്‍ ആണ് സഹോദരാ, നാട്ടുകാരെ കാണിക്കല്‍ തന്നെ ആണ് ഉദ്ദേശ്യം. താല്‍പര്യം ഉണ്ടെങ്കില്‍ മാത്രം കണ്ടാല്‍ മതി”-സാധിക പറഞ്ഞു.
സിനിമകളിലും സീരിയലുകളിലും ഒരുപോലെ തിളങ്ങുന്ന നടിയാണ് സാധിക വേണുഗോപാല്‍. ടെലിവിഷന്‍ അവതാരകയായി മിനി സ്‌ക്രീനിലും സജീവമാണ്. ഓര്‍ക്കുട്ട് ഒരു ഓര്‍മക്കൂട്ട് എന്ന സിനിമയിലൂടെയാണ് സാധിക വേണുഗോപാല്‍ സിനിമാഭിനയം തുടങ്ങുന്നത്. കലികാലം, എം എല്‍ എ മണി പത്താം ക്ലാസും ഗുസ്തിയും, ബ്രേക്കിങ് ന്യൂസ് തുടങ്ങിയവയാണ് പ്രധാന സിനിമകള്‍.
