നാമക്കൽ മുട്ട കയറ്റുമതി നിലച്ചു; ദിവസവും 5 കോടി രൂപ നഷ്ടം

നാമക്കൽ മുട്ട കയറ്റുമതി നിലച്ചു; ദിവസവും 5 കോടി രൂപ നഷ്ടം

ഇസ്രയേൽ–ഇറാൻ യുദ്ധത്തെ തുടർന്ന് മിഡിൽ ഈസ്റ്റ് രാജ്യങ്ങളിലേക്കുള്ള മുട്ടയും പച്ചക്കറികളും കയറ്റുമതി നിർത്തി. തമിഴ്നാട്ടിലെ നാമക്കൽ ജില്ലയിൽ നിന്നുള്ള മുട്ട കയറ്റുമതിയിൽ മാത്രം ദിവസവും 5 കോടി രൂപയുടെ നഷ്ടമുണ്ടാകുന്നതായി വ്യാപാരികൾ പറയുന്നു.

സൗദി അറേബ്യ, മസ്കത്ത്, യുഎഇ, ഖത്തർ, ഒമാൻ, ഇറാൻ എന്നിവിടങ്ങളിലേക്കാണ് നാമക്കലിൽ നിന്ന് പ്രധാനമായും മുട്ട കയറ്റി അയക്കുന്നത്. സാധാരണയായി ദിവസവും ഏകദേശം 1.10 കോടി മുട്ടകൾ ഈ രാജ്യങ്ങളിലേക്ക് കയറ്റുമതി ചെയ്യാറുണ്ട്.

മാർച്ച് ഒന്നിനാണ് പശ്ചിമേഷ്യയിൽ യുദ്ധം ആരംഭിച്ചത്. തുടർന്ന് മാർച്ച് രണ്ടുമുതൽ കയറ്റുമതി പൂർണമായി നിർത്തിവയ്ക്കേണ്ടി വന്നതായി വ്യാപാരികൾ പറഞ്ഞു. യുദ്ധസാഹചര്യത്തിൽ തുറമുഖങ്ങൾ അടച്ചതും വ്യോമാതിർത്തികളിൽ നിയന്ത്രണങ്ങൾ വന്നതുമാണ് പ്രതിസന്ധിക്ക് കാരണം.

രാജ്യത്ത് ഏറ്റവും കൂടുതൽ മുട്ട ഉൽപാദിപ്പിക്കുകയും കയറ്റുമതി ചെയ്യുകയും ചെയ്യുന്ന ജില്ലയാണ് നാമക്കൽ. എന്നാൽ കയറ്റുമതി നിലച്ചതോടെ മുട്ടകൾ വലിയ തോതിൽ കെട്ടിക്കിടക്കുകയാണ്.

സാധാരണയായി ഒരു മുട്ട 4.80 രൂപ നിരക്കിലാണ് കയറ്റുമതി ചെയ്യുന്നത്, എന്നാൽ ഉൽപാദനച്ചെലവ് തന്നെ ഏകദേശം 4.50 രൂപ വരുമെന്ന് വ്യാപാരികൾ പറയുന്നു. ഇപ്പോൾ പ്രതിസന്ധി മൂലം 3.50 രൂപയ്ക്കു വരെ മുട്ട വിൽക്കേണ്ട അവസ്ഥയാണെന്നും അവർ വ്യക്തമാക്കുന്നു.

മുട്ട ദീർഘകാലം സൂക്ഷിക്കാൻ കഴിയാത്തതിനാൽ ഇനി ഒരാഴ്ചയ്ക്കകം വലിയ നഷ്ടം നേരിടേണ്ടിവരുമെന്ന ആശങ്കയും വ്യാപാരികൾ പങ്കുവെക്കുന്നു.

പച്ചക്കറി കയറ്റുമതിയും ബാധിച്ചു

യുദ്ധത്തെ തുടർന്ന് തിരുച്ചിറപ്പിള്ളിയിൽ നിന്നുള്ള പഴം–പച്ചക്കറി കയറ്റുമതിയും നിലച്ചിട്ടുണ്ട്. മിഡിൽ ഈസ്റ്റ് രാജ്യങ്ങളിലേക്കു സാധാരണയായി ദിവസവും 20 ടൺ പച്ചക്കറികൾ കയറ്റി അയയ്ക്കാറുണ്ട്.

പ്രധാനമായും അബുദാബി, ദുബായ്, ഷാർജ എന്നീ യുഎഇ എമിറേറ്റുകളിലേക്കാണ് കയറ്റുമതി നടക്കുന്നത്. മാർച്ച് 2 മുതൽ കയറ്റുമതി നിർത്തിയതോടെ ഏകദേശം 80 ടൺ പച്ചക്കറികൾ ഗോഡൗണുകളിൽ കെട്ടിക്കിടക്കുകയാണ്.

ഇതുവരെ ഏകദേശം 14 കോടി രൂപയുടെ നഷ്ടം സംഭവിച്ചതായി വ്യാപാരികൾ പറയുന്നു.

കേന്ദ്ര ഇടപെടൽ ആവശ്യപ്പെട്ടു

കയറ്റുമതി പ്രതിസന്ധി പരിഹരിക്കാൻ കേന്ദ്ര സർക്കാർ ഇടപെടണമെന്ന് വ്യാപാരികൾ ആവശ്യപ്പെട്ടു. ചരക്കുകപ്പലുകളുടെ സുരക്ഷ ഉറപ്പാക്കുന്നതിനായി യുഎസ്, ഇസ്രയേൽ, ഇറാൻ തുടങ്ങിയ രാജ്യങ്ങളുമായി നയതന്ത്രതലത്തിൽ ഇടപെടണമെന്നും അവർ ആവശ്യപ്പെട്ടു.

English Summary

The Israel–Iran conflict has disrupted exports from Tamil Nadu, particularly from Namakkal, India’s largest egg-producing district. Egg exports to Middle Eastern countries have stopped, causing a daily loss of about ₹5 crore to traders. Around 1.10 crore eggs are usually exported daily to countries such as Saudi Arabia, UAE, Oman, Qatar, and Iran. Vegetable exports from Tiruchirappalli have also been affected, with about 80 tonnes of produce currently stuck in warehouses.