ഹോർമുസ് കടലിടുക്ക് കടക്കാൻ 2 മില്യൺ ഡോളർ ഫീസ്; ഇറാന്റെ നീക്കം ആഗോള ഇന്ധന വിപണിയെ ബാധിക്കുമോ?
ടെഹ്റാൻ: മിഡിൽ ഈസ്റ്റ് സംഘർഷം രൂക്ഷമാകുന്നതിനിടെ ഹോർമുസ് കടലിടുക്കിലൂടെ കടന്നുപോകുന്ന കപ്പലുകളിൽ നിന്ന് വൻ ട്രാൻസിറ്റ് ഫീസ് ഈടാക്കാൻ ഇറാൻ തുടങ്ങി എന്ന റിപ്പോർട്ട് പുറത്ത്.
മിഡിൽ ഈസ്റ്റിൽ സംഘർഷാവസ്ഥ കടുത്തതോടെ ലോകത്തിലെ ഏറ്റവും നിർണായകമായ സമുദ്ര പാതകളിൽ ഒന്നായ ഹോർമുസ് കടലിടുക്കിൽ പുതിയ വിവാദം ഉയർന്നു. ഈ കടലിടുക്കിലൂടെ കടന്നുപോകുന്ന ചരക്കുകപ്പലുകളിൽ നിന്ന് ഇറാൻ ഏകദേശം 2 മില്യൺ ഡോളർ (ഏകദേശം 18.76 കോടി രൂപ) വരെ ട്രാൻസിറ്റ് ഫീസ് ഈടാക്കുന്നതായി റിപ്പോർട്ടുകൾ വ്യക്തമാക്കുന്നു.
ലണ്ടൻ ആസ്ഥാനമായുള്ള ‘ഇറാൻ ഇന്റർനാഷണൽ’ റിപ്പോർട്ട് പ്രകാരം, ആഗോള ഇന്ധന ഗതാഗതത്തിൽ നിർണായകമായ ഈ പാതയിൽ നിന്നാണ് ഇറാൻ സാമ്പത്തിക നേട്ടം കണ്ടെത്താൻ ശ്രമിക്കുന്നത്. ഇറാൻ പാർലമെന്റിന്റെ ദേശീയ സുരക്ഷ കമ്മിറ്റി അംഗമായ അലാവുദ്ദീൻ ബോറൂജെർഡി, യുദ്ധച്ചെലവുകൾ നിറവേറ്റുന്നതിനായാണ് ഈ ഫീസ് ഈടാക്കുന്നതെന്ന് വ്യക്തമാക്കിയിട്ടുണ്ട്. ഹോർമുസ് കടലിടുക്കിൽ തങ്ങളുടെ ശക്തിയും നിയന്ത്രണവും പ്രകടിപ്പിക്കാനുള്ള നീക്കമാണിതെന്നും അദ്ദേഹം കൂട്ടിച്ചേർത്തു.
ഇതിനിടെ, ഹോർമുസ് കടലിടുക്ക് 48 മണിക്കൂറിനുള്ളിൽ തുറന്നില്ലെങ്കിൽ ഇറാന്റെ ഊർജ അടിസ്ഥാന സൗകര്യങ്ങളെ ലക്ഷ്യമാക്കി ആക്രമണം നടത്തുമെന്ന് യു.എസ് പ്രസിഡന്റ് ഡൊണാൾഡ് ട്രംപ് മുന്നറിയിപ്പ് നൽകിയിരുന്നു. ഇതിന് പിന്നാലെയാണ് ഇറാൻ ഭാഗത്ത് നിന്ന് കൂടുതൽ കടുത്ത നിലപാടുകൾ ഉയരുന്നത്.
അതേസമയം, ഇറാൻ പ്രസിഡന്റ് മസൂദ് പെസഷ്കിയാൻ ഹോർമുസ് കടലിടുക്ക് ‘ശത്രുക്കൾക്കല്ലാതെ’ മറ്റ് രാജ്യങ്ങൾക്ക് തുറന്നിരിക്കുമെന്ന് അറിയിച്ചു. ഇന്ത്യ, പാകിസ്താൻ, ജപ്പാൻ എന്നിവയുമായി ബന്ധപ്പെട്ട കപ്പലുകൾക്ക് കടന്നുപോകാൻ അനുമതി നൽകുന്നതായും ഇറാൻ വ്യക്തമാക്കിയിട്ടുണ്ട്.
ലോകത്തിലെ ഏകദേശം 20% എണ്ണയും ദ്രാവക പ്രകൃതിവാതകവും (LNG) ഹോർമുസ് കടലിടുക്കിലൂടെ കടന്നുപോകുന്നതാണ്. ഈ പാതയിലെ നിയന്ത്രണവും തടസ്സങ്ങളും ഇതിനകം തന്നെ ആഗോള ഇന്ധനവില ഉയരാൻ കാരണമായിട്ടുണ്ട്. നിലവിലെ സാഹചര്യം തുടർന്നാൽ ഇന്ധന വിപണിയിൽ കൂടുതൽ അസ്ഥിരത ഉണ്ടാകാനാണ് സാധ്യത.
English Summary
Iran is reportedly charging up to $2 million per ship to pass through the Strait of Hormuz amid rising Middle East tensions. The move could significantly impact global oil supply and fuel prices.
