ഏറ്റുമാനൂർ: അർധരാത്രി ടെറസിനു മുകളിൽ ബൂട്ട് ഇട്ടു ചവിട്ടുന്ന ശബ്ദം, വാട്ടർ ടാങ്കിൽ നിന്നു മഴ പോലെ വെള്ളം ഒഴുക്കിവിടൽ, ‌മേൽക്കൂരയിലേക്ക് കല്ലേറ്. നിരന്തരമായി അജ്ഞാതൻ്റെ ശല്യം അനുഭവപ്പെടുന്നതായി കുടുംബത്തിന്റെ പരാതി. ഏറ്റുമാനൂ‍ർ തവളക്കുഴി കലാസദനത്തിൽ രാജനും കുടുംബവുമാണ് രണ്ടാഴ്ചയായി രാത്രിയിൽ അജ്ഞാതന്റെ ശല്യം കൊണ്ട് ബുദ്ധിമുട്ടുന്നത്. അജ്ഞാതൻ ആരാണെന്നറിയുന്നതിനായി കുടുംബം പൊലീസിൽ പരാതി നൽകുകയായിരുന്നു.

സംഭവം റസിഡൻസ് അസോസിയേഷനെ അറിയിക്കുകയും റെസിഡൻഷ്യൽ അംഗങ്ങളുടെ നേതൃത്വത്തിൽ പൊലീസിൽ പരാതി നൽകുകയുമായിരുന്നു. അർധരാത്രി കഴിയുന്നതോടെ വീടിന് മുകളിലെ ടെറസിൽ നിന്ന് പലവിധത്തിലുള്ള ശബ്ദം ഉണ്ടാക്കുന്നത് ശ്രദ്ധയിൽപ്പെട്ടത്. ബൂട്ടിട്ട് അമർത്തി ചവിട്ടി നടക്കുന്ന ശബ്ദം ആയിരുന്നു ആദ്യം ശ്രദ്ധയിൽപ്പെട്ടത്. ആദ്യം കരുതിയത് മരപ്പട്ടിയൊ മറ്റെന്തെങ്കിലും ആയിരിക്കുമെന്നാണ്. പിന്നെ ടാങ്കിൽ നിന്ന് വെള്ളം ഒഴുക്കിവിടാൻ തുടങ്ങി. ടെറസിലെ ടാങ്കിലെ പൈപ്പ് ആക്‌സോ ബ്ലെയ്ഡ് ഉപയോഗിച്ച് മുറിച്ച നിലയിൽ കണ്ടെത്തി. ആക്‌സോ ബ്ലെയിഡ് സമീപത്ത് നിന്ന് കണ്ടെത്തി.

പിടികൂടാൻ രാത്രി ഉറക്കമൊഴിച്ച് കുടുംബം കാത്തിരുന്നുവെങ്കിലും അജ്ഞാതൻ രക്ഷപ്പെട്ടു. പിറ്റേദിവസം രാവിലെ മുയലിനെ വളർത്തുന്ന കൂട്ടിൽ പോയി നോക്കിയപ്പോൾ കാണുന്നത് ഒരു മുയലിനെ തല്ലിക്കൊന്നിട്ടിരിക്കുന്നതായാണ് കണ്ടെതെന്നും കുടുംബം പറയുന്നു.