വേദനകൾക്കിടയിലും താലിചാർത്തി; ലേക്ഷോർ ആശുപത്രിയിൽ അപൂർവ വിവാഹം
കൊച്ചി: ചികിത്സയിലായിരുന്ന യുവതിക്കായി ആശുപത്രി തന്നെ വിവാഹവേദിയായ അപൂർവ സംഭവത്തിന് സാക്ഷ്യം വഹിച്ചു വി.പി.എസ് ലേക്ഷോർ ആശുപത്രി. ഗാസ്ട്രോ ശസ്ത്രക്രിയയ്ക്കുശേഷം ചികിത്സയിൽ തുടരുന്ന ദിയ ജി. പ്രഹ്ലാദിന് (26) വരൻ ജിതിൻ ജയൻ ആശുപത്രിക്കുള്ളിലെ ക്ഷേത്രത്തിൽ താലിചാർത്തി.
മാസങ്ങൾക്ക് മുമ്പ് നിശ്ചയിച്ചിരുന്ന വിവാഹത്തിനിടെ ദിയയ്ക്ക് അപ്രതീക്ഷിതമായി ആരോഗ്യപ്രശ്നങ്ങൾ ഉണ്ടാവുകയും അടിയന്തിര ശസ്ത്രക്രിയക്ക് വിധേയയാകുകയും ചെയ്തു. യാത്ര ചെയ്യാൻ കഴിയാത്ത സാഹചര്യം നിലനിന്നതിനാൽ, നിശ്ചയിച്ച തീയതിയിൽ തന്നെ വിവാഹം നടത്താൻ കുടുംബം തീരുമാനിക്കുകയായിരുന്നു.
വ്യാഴാഴ്ച രാവിലെ നിശ്ചയിച്ച മുഹൂർത്തത്തിൽ ആശുപത്രിയിലെ ക്ഷേത്രത്തിൽ നടന്ന ചടങ്ങിൽ അടുത്ത ബന്ധുക്കളോടൊപ്പം ആശുപത്രി മാനേജ്മെന്റും ഡോക്ടർമാരും നഴ്സുമാരും പങ്കെടുത്തു. വേദനകൾ മറന്ന് ദിയ സുമംഗലിയായ നിമിഷം സാക്ഷികൾക്ക് ഹൃദയസ്പർശിയായി.
സർജിക്കൽ ഗാസ്ട്രോഎൻററോളജി വിദഗ്ധരായ ഡോക്ടർമാർ ഉൾപ്പെടെ ചികിത്സാ സംഘം ചടങ്ങുകളിൽ സജീവമായി പങ്കെടുത്തു. ആശുപത്രി അധികൃതർ തന്നെ താലിമാലയും പൂമാലകളും ഒരുക്കി നൽകി.
ഇതിനിടെ, കായംകുളത്ത് ബന്ധുക്കളും സുഹൃത്തുക്കളും ചേർന്ന് വിവാഹസൽക്കാര ചടങ്ങുകളും പ്രത്യേകം സംഘടിപ്പിച്ചു.
സൗദി അറേബ്യയിൽ ഹെൽത്ത് ആൻഡ് സേഫ്റ്റി ഓഫീസറായ ജിതിൻ, “ഇത്തരം സാഹചര്യത്തിലും വിവാഹം ഭംഗിയായി നടത്താൻ സഹായിച്ച ആശുപത്രി അധികൃതരോട് നന്ദിയുണ്ട്,” എന്ന് പ്രതികരിച്ചു.
ചികിത്സ തുടരുന്ന ദിയയുടെ ആരോഗ്യനില മെച്ചപ്പെടുന്നുണ്ടെന്ന് ഡോക്ടർമാർ അറിയിച്ചു.
English Summary:
A young woman undergoing treatment after surgery got married inside VPS Lakeshore Hospital in Kochi. As she couldn’t travel, the wedding was conducted in the hospital temple with the support of doctors and staff, making it an emotional and rare event.
hospital-wedding-vps-lakeshore-kochi-surgery-bride
Hospital Wedding, VPS Lakeshore, Kochi News, Kerala News, Emotional Story, Marriage, Health News
