മഞ്ഞുമൂടിയ ഈ വാൽനക്ഷത്രത്തിന് ചുറ്റും ഒരു വളഞ്ഞ പ്രകാശവലയം ഉണ്ടത്രെ. ചുറ്റുപാടും പച്ചവെളിച്ചം പ്രസരിക്കുന്നതിനാലാണ് അതിനെ ഗ്രീൻ ഡെവിൾ എന്ന് വിളിക്കുന്നത്. അതിൻ്റെ വീതി ഏകദേശം 17 കിലോമീറ്ററാണ്. ഇത് 71 വർഷത്തിനുള്ളിൽ സൂര്യനെ ചുറ്റിവരുമെന്നാണ് ഗവേഷകർ വ്യക്തമാക്കുന്നത്.
സൂര്യനെ ലക്ഷ്യമാക്കി നീങ്ങുന്ന 12പി/പോൺസ്-ബ്രൂക്സ് (12P/Pons-Brooks) എന്ന വാൽനക്ഷത്രം 2024 ജൂൺ രണ്ടിന് ഭൂമിയുടെ അടുത്തെത്തും. അന്ന് ‘മദർ ഓഫ് ഡ്രാഗൺസ്’ എന്ന് വിളിക്കുന്ന ഈ വാൽനക്ഷത്രത്തെ നഗ്നനേത്രങ്ങൾ കൊണ്ട് കാണാനാകുമെന്ന് ജ്യോതിശാസ്ത്രജ്ഞർ വ്യക്തമാക്കുന്നു. മുമ്പ് ഈ വാൽനക്ഷത്രത്തിന്റെ തലഭാഗത്ത് കൊമ്പുകൾ പോലെയുള്ള രൂപമുണ്ടായിരുന്നു. എപ്പോഴും രൂപമാറ്റം മാറ്റം സംഭവിക്കുന്ന ഈ വാൽനക്ഷത്രത്തെ ഡെവിൾ കോമറ്റ് എന്നാണ് ഗവേഷകർ വിശേഷിപ്പിക്കുന്നത്.
ഐസും വാതകവും പൊടിയും നിറഞ്ഞതാണ് ഈ പച്ച ചെകുത്താൻ വാൽനക്ഷത്രം. വാൽനക്ഷത്രത്തിൻ്റെ മധ്യഭാഗത്തുള്ള വസ്തുക്കൾ പതുക്കെ പുറത്തുവരുന്നു. ഈ ധൂമകേതു ക്രയോവോൾക്കാനിക് ആണ്. അതായത് സൂര്യപ്രകാശം അതിൽ പതിക്കുമ്പോൾ തന്നെ അത് ഐസ് ഉറവകൾ തുപ്പുന്നു. ഇതിനെ ക്രയോമാഗ്മ എന്ന് വിളിക്കുന്നു. ഈ ജലധാരയാണ് അതിൻ്റെ നീണ്ട വാൽ ആയി നാം കാണുന്നത്.
69 വർഷത്തിന് ശേഷം ജൂലൈ മാസത്തിൽ ബഹിരാകാശത്ത് ദൃശ്യമായതോടെയാണ് കഴിഞ്ഞ വർഷം ഇതേക്കുറിച്ച് ചർച്ച ആരംഭിച്ചത്. 2024 മാർച്ച് 9-ന് ജ്യോതിശാസ്ത്രജ്ഞനായ ജാൻ എറിക് വാലെസ്റ്റാഡ് അതിൻ്റെ പുതിയ ചിത്രങ്ങൾ എടുത്തിരുന്നു. നോർവേയിൽ നിന്നാണ് ചിത്രങ്ങൾ എടുത്തത്. ഇതിനായി പ്രത്യേക തരം ക്യാമറകളും സോഫ്റ്റ് വെയറുകളും ഉപയോഗിച്ചു. ഇപ്പോൾ ഈ ധൂമകേതു നമ്മുടെ സൗരയൂഥത്തിൻ്റെ ഉൾഭാഗത്ത് മണിക്കൂറിൽ 64,500 കിലോമീറ്റർ വേഗതയിൽ സൂര്യനു നേരെ നീങ്ങിക്കൊണ്ടിരിക്കുകയാണെന്നാണ് റിപ്പോർട്ടുകൾ. 2024 ഏപ്രിൽ 24-ന് ഇത് സൂര്യനോട് ഏറ്റവും അടുത്തായിരിക്കും.
