നതാഷ സ്റ്റാന്‍കോവിച്ചുമായി വേര്‍പിരിഞ്ഞ വിവരം ഒടുവിൽ പരസ്യമാക്കി ഇന്ത്യന്‍ ക്രിക്കറ്റ് താരം ഹര്‍ദിക് പാണ്ഡ്യ. നാലു വര്‍ഷത്തെ ദാമ്പത്യ ജീവിതത്തിനുശേഷമുള്ള ഈ വേര്‍പിരിയല്‍ കഠിനമാണെന്നും എന്നാൽ, രണ്ടുപേരും ചേര്‍ന്നെടുത്ത തീരുമാനമാണിതെന്നു താരം വെളിപ്പെടുത്തി.ഇന്‍സ്റ്റഗ്രാം കുറിപ്പിലൂടെയാണ് ഹര്‍ദിക് വിവരം പുറത്തുവിട്ടത്. (Hardik Pandya made public the information about his breakup with Natasha)
”നാലു വര്‍ഷം ഒരുമിച്ചു കഴിഞ്ഞ ശേഷം ഞാനും നതാഷയും വേര്‍പിരിയാന്‍ ഒന്നിച്ചു തീരുമാനമെടുത്തിരിക്കുകയാണ്. ഒന്നായിരിക്കാന്‍ പരമാവധി ശ്രമിച്ചിരുന്നു. എന്നാല്‍, ഇതാണു രണ്ടുപേര്‍ക്കും ഏറ്റവും നല്ലതെന്നാണു തങ്ങള്‍ വിശ്വസിക്കുന്നത്. സന്തോഷവും പരസ്പര ബഹുമാനവും സൗഹൃദവുമെല്ലാം ഒന്നിച്ചാസ്വദിച്ച്, ഒരു കുടുംബമായി വളര്‍ന്നവരാണെന്നതു കൊണ്ടുതന്നെ ഈ തീരുമാനം കഠിനമായിരുന്നു” കുറിച്ചു. നതാഷയും ഇന്‍സ്റ്റഗ്രാമില്‍ ഇതേ കുറിപ്പ് പങ്കുവച്ചിട്ടുണ്ട്. മകന്‍ അഗസ്ത്യനെ രണ്ടുപേരും ചേര്‍ന്നു നോക്കുമെന്നും താരം പറഞ്ഞു.
