കെഡിആര്ബി വിജ്ഞാപനങ്ങള് റദ്ദാക്കി; റിക്രൂട്ട്മെന്റ് ബോർഡിന് അധികാരമില്ല; നിര്ണായക നടപടിയുമായി ഹൈക്കോടതി
കൊച്ചി: ഗുരുവായൂര് ദേവസ്വത്തിലെ നിയമനങ്ങളില് നിര്ണായക ഇടപെടലുമായി ഹൈക്കോടതി.
ദേവസ്വം റിക്രൂട്ട്മെന്റ് ബോര്ഡിന് (കെഡിആര്ബി) ഗുരുവായൂര് ദേവസ്വത്തില് നിയമനം നടത്താനുള്ള അധികാരം റദ്ദാക്കി.
ഹൈക്കോടതി ഡിവിഷന് ബെഞ്ചാണ് ഉത്തരവ് പുറപ്പെടുവിച്ചത്.
നിയമന അധികാരം മാനേജിങ് കമ്മിറ്റിക്ക്
ഗുരുവായൂര് ദേവസ്വത്തിലെ നിയമന അധികാരം ഇനി ദേവസ്വം മാനേജിങ് കമ്മിറ്റിക്കാണെന്ന് കോടതി വ്യക്തമാക്കി.
ഇതോടൊപ്പം, നിലവില് നിയമനത്തിനായി പുറത്തിറക്കിയ എല്ലാ വിജ്ഞാപനങ്ങളും ഹൈക്കോടതി റദ്ദാക്കി.
സുതാര്യതയ്ക്കായി മേല്നോട്ടസമിതി
നിയമന പ്രക്രിയയില് സുതാര്യത ഉറപ്പാക്കുന്നതിനായി മൂന്നംഗ മേല്നോട്ടസമിതിയെയും കോടതി നിയോഗിച്ചു.
റിട്ട. ജസ്റ്റിസ് പി.എന്. രവീന്ദ്രനാണ് സമിതിയുടെ ചെയര്മാന്.
ഗുരുവായൂര് ദേവസ്വം മാനേജിങ് കമ്മിറ്റി അഡ്മിനിസ്ട്രേറ്ററും അഡ്വക്കേറ്റ് കെ. ആനന്ദും സമിതിയംഗങ്ങളായിരിക്കും.
സമിതിയുടെ കാലാവധി ഒരു വര്ഷമായിരിക്കും.
പഴയ നിയമനങ്ങള്ക്ക് ബാധകമല്ല
കെഡിആര്ബി വഴി ഇതിനകം നടന്ന നിയമനങ്ങളെ ഈ ഉത്തരവ് ബാധിക്കില്ലെന്നും ഹൈക്കോടതി വ്യക്തമാക്കി.
എന്നാല് തുടര്ന്നുള്ള നിയമനങ്ങള് റിക്രൂട്ട്മെന്റ് ബോര്ഡ് മുഖേന നടത്താന് സാധിക്കില്ല.
നിയമവിരുദ്ധമാണെന്ന് സെക്ഷന് 9
ഗുരുവായൂര് ദേവസ്വത്തിലെയും ദേവസ്വത്തിന് കീഴിലുള്ള എയ്ഡഡ് വിദ്യാഭ്യാസ സ്ഥാപനങ്ങളിലെയും നിയമനങ്ങള്ക്ക് അനുമതി നല്കുന്ന കെഡിആര്ബി സെക്ഷന് 9 നിയമവിരുദ്ധമാണെന്ന് കോടതി വിലയിരുത്തി.
ഈ അടിസ്ഥാനത്തിലാണ് റിക്രൂട്ട്മെന്റ് ബോര്ഡിന്റെ അധികാരം റദ്ദാക്കിയത്.
38 തസ്തികകളിലേക്കുള്ള വിജ്ഞാപനം റദ്ദാക്കും
ഉത്തരവിന്റെ ഭാഗമായി ക്ലര്ക്ക് ഉള്പ്പെടെ 38 തസ്തികകളിലേക്ക് കെഡിആര്ബി മാസങ്ങള്ക്ക് മുമ്പ് പുറത്തിറക്കിയ വിജ്ഞാപനം റദ്ദാക്കും.
English Summary:
The Kerala High Court has revoked the Devaswom Recruitment Board’s authority over the Guruvayur Devaswom appointments and handed recruitment powers to the Managing Committee to ensure transparency. However, the verdict will not affect appointments already made through the Recruitment Board.
