ആലപ്പുഴ: ഭാര്യയെയും മക്കളെയും ഭാര്യാപിതാവിനെയും ആക്രമിക്കാൻ ശ്രമിച്ച പ്രതി പിടിയിൽ. അമ്പലപ്പുഴയിലാണ് സംഭവം. ഭാര്യവീട്ടിൽ അതിക്രമിച്ച് കയറിയായിരുന്നു ആക്രമണത്തിന് ശ്രമിച്ചത്. മാന്നാർ സ്വദേശി പ്രമോദിനെയാണ് അറസ്റ്റ് ചെയ്തത്.
കൊലപാതകം നടത്തുക എന്ന ലക്ഷ്യത്തോടെ ഗുണ്ടുകളും പെട്രോളും കത്തിയുമായി എത്തിയ പ്രതിയെ നാട്ടുകാരുടെ സഹായത്തോടെയാണ് പൊലീസ് കീഴടക്കിയത്.

വധശ്രമം ഉൾപ്പെടെയുള്ള വകുപ്പുകൾ ചുമത്തിയാണ് പൊലീസ് ഇയാൾക്കെതിരെ കേസെടുത്തത്. ഞായറാഴ്ച രാത്രി പത്ത് മണിയോടെയായിരുന്നു കേസിന് ആസ്പദമായ സംഭവം. തോട്ടപ്പള്ളിയിലുള്ള ഇയാളുടെ ഭാര്യ രാധുവിന്റെ വീട്ടിലെത്തിയാണ് അതിക്രമം നടത്തിയത്. ഭാര്യയും 10, 9 വയസുള്ള ആൺമക്കളും ഇവിടെ ഉണ്ടായിരുന്നു. രാധുവിനെ വിളിച്ച് കാര്യം സംസാരിക്കാനുണ്ടെന്ന് പറഞ്ഞെങ്കിലും ഇവർ പുറത്തിറങ്ങാൻ തയാറായില്ല.

പിന്നാലെ സ്‌കൂട്ടറോടിച്ച് വീടിന്റെ മുറ്റത്തെത്തിയ പ്രമോദ് ഭാര്യാപിതാവ് മോഹൻദാസുമായി വഴക്കുണ്ടാക്കി. പ്രദേശവാസികളാണ് ഇക്കാര്യം പോലീസിൽ അറിയിച്ചത്. തുടർന്ന് അമ്പലപ്പുഴ പൊലീസെത്തി സാഹസികമായി ഇയാളെ കീഴ്‌പ്പെടുത്തുകയായിരുന്നു. ഇയാളുടെ പക്കലുണ്ടായിരുന്ന തോൾ സഞ്ചിയിൽ നിന്ന് ആറ് ഗുണ്ടുകളും കുപ്പികളിലാക്കിയ മൂന്ന് ലിറ്ററോളം പെട്രോളും കത്തിയും റോപ്പും കണ്ടെടുത്തു.

കുടുംബ വഴക്കിനെ തുടർന്നുണ്ടായ വിരോധമാണ് ആക്രമിക്കാൻ കാരണമായതെന്ന് പൊലീസ് പറയുന്നു. മദ്യപിച്ചെത്തി ഭാര്യയെയും മക്കളെയും പ്രമോദ് ഉപദ്രവിക്കുന്നത് പതിവായിരുന്നു. തുടർന്ന് ഉപദ്രവം സഹിക്ക വയ്യാതെ വന്നതോടെയാണ് മാന്നാറിലെ ഭർതൃവീട്ടിൽ നിന്നും മക്കളെയും കൂട്ടി സ്വന്തം ഗൃഹത്തിലെത്തിയത്. അമ്പലപ്പുഴ കോടതിയിൽ ഹാജരാക്കിയ ഇയാളെ റിമാൻഡ് ചെയ്തു.