കോട്ടയം: കോട്ടയം വെസ്റ്റ് പൊലീസ് സ്റ്റേഷനിൽ നിന്ന് കാണാതായ ഗ്രേഡ് എസ്ഐ അനീഷ് വിജയൻ സുരക്ഷിതനെന്ന് സഹോദരൻ. ഫേസ്ബുക്കിലൂടെയാണ് അനീഷിന്റെ സഹോദരൻ ഇക്കാര്യം അറിയിച്ചത്.
തൻറെ സഹോദരൻ വീട്ടിലേക്ക് ഫോൺ ചെയ്തെന്നും സുരക്ഷിതനാണെന്നും അദ്ദേഹം ഫേസ്ബുക്ക് പോസ്റ്റിൽ പറയുന്നു. അനീഷ് ചൊവ്വാഴ്ച വീട്ടിലെത്തുമെന്നാണ് അറിയിച്ചതെന്നും കുറിപ്പിൽ വ്യക്തമാക്കിയിട്ടുണ്ട്.
പത്തനംതിട്ട സ്വദേശിയായ അനീഷ് വിജയൻ ബുധൻ, വ്യാഴം ദിവസങ്ങളിൽ അവധിയെടുത്തിയിരുന്നു. തുടർന്ന് ഇന്നലെ കോട്ടയം വെസ്റ്റ് പൊലീസ് സ്റ്റേഷനിൽ ഡ്യൂട്ടിക്ക് എത്തിയിരുന്നു.
ഇതിന് ശേഷം പൊലീസ് ഉദ്യോഗസ്ഥനെ കാണാനില്ലെന്നായിരുന്നു പരാതി. തുടർന്ന് പൊലീസ് സംഘം അന്വേഷണം നടത്തി വരികയായിരുന്നു. ഇതിനിടയാണ് ഫേസ്ബുക്ക് കുറിപ്പുമായി സഹോദരൻ രംഗത്തെത്തിയത്.
