‘പ്രേതക്കപ്പൽ’ വീണ്ടും ഹോർമുസ് കടന്നു? ആക്രിക്കായി മാറ്റിയ ടാങ്കർ ക്രൂഡ് ഓയിലുമായി സഞ്ചരിച്ചതായി റിപ്പോർട്ട്

‘പ്രേതക്കപ്പൽ’ വീണ്ടും ഹോർമുസ് കടന്നു? ആക്രിക്കായി മാറ്റിയ ടാങ്കർ ക്രൂഡ് ഓയിലുമായി സഞ്ചരിച്ചതായി റിപ്പോർട്ട്

ഹോർമുസ് കടലിടുക്കിൽ വീണ്ടും ‘പ്രേതക്കപ്പൽ’ വിവാദം. വർഷങ്ങൾ മുൻപ് പൊളിക്കാൻ മാറ്റിയതായി രേഖകളിലുള്ള കപ്പൽ ക്രൂഡ് ഓയിലുമായി സഞ്ചരിച്ചതായി ഷിപ് ട്രാക്കിങ് ഡാറ്റ സൂചിപ്പിക്കുന്നു.

മിഡിൽ ഈസ്റ്റിലെ യുദ്ധ സംഘർഷങ്ങൾ രൂക്ഷമാകുന്നതിനിടെ ഹോർമുസ് കടലിടുക്കിലൂടെ ‘പ്രേതക്കപ്പൽ’ സഞ്ചരിച്ചെന്ന റിപ്പോർട്ടുകൾ വീണ്ടും ശ്രദ്ധ നേടുന്നു. ‘നബീൻ’ എന്ന പേരിൽ സഞ്ചരിക്കുന്ന ടാങ്കറാണ് പുതിയ വിവാദത്തിന് കാരണമായിരിക്കുന്നത്.

ഷിപ് ട്രാക്കിങ് രേഖകൾ പ്രകാരം, ഞായറാഴ്ച വൈകുന്നേരം പേര്‍ഷ്യൻ കടലിടുക്കിൽ കണ്ട കപ്പൽ തിങ്കളാഴ്ച രാവിലെ ഒമാൻ കടലിടുക്കിലെത്തി. എന്നാൽ 2002ൽ നിർമ്മിച്ച ഈ കപ്പൽ പ്രവർത്തനക്ഷമമല്ലെന്ന് കണ്ടെത്തിയതിനാൽ അഞ്ചുവർഷം മുൻപ് ബംഗ്ലദേശിലേക്ക് പൊളിക്കാൻ മാറ്റിയതായാണ് ഔദ്യോഗിക രേഖകൾ വ്യക്തമാക്കുന്നത്.

ഇത്തരത്തിൽ സ്ക്രാപ്പിനായി മാറ്റിയ കപ്പലുകളുടെ പേരിൽ ഇന്ധനം കടത്തുന്ന പ്രവണതയുണ്ടെന്ന് അന്താരാഷ്ട്ര മാധ്യമങ്ങൾ നേരത്തെ റിപ്പോർട്ട് ചെയ്തിട്ടുണ്ട്. അതിനാൽ തന്നെ ‘നബീൻ’ എന്ന പേരിൽ സഞ്ചരിക്കുന്ന ഈ കപ്പൽ ഒരു ‘സോംബി ടാങ്കർ’ ആകാമെന്ന സംശയമാണ് ഉയരുന്നത്.

ഇതിനു മുമ്പ്, ഇന്ത്യയിലെ പൊളിക്കൽ കേന്ദ്രത്തിൽ എത്തിച്ചതായി രേഖകളിലുള്ള ‘ജമാൽ’ എന്ന എൽഎൻജി കപ്പലും ഹോർമുസ് കടന്നതായി റിപ്പോർട്ട് വന്നിരുന്നു. ഇതോടെ ഇത്തരം കപ്പലുകളുടെ ഗതാഗതം വീണ്ടും സംശയത്തിനിടയാക്കിയിരിക്കുകയാണ്.

എന്നാൽ ‘നബീൻ’ എന്ന പേരിലുള്ള കപ്പലിന്റെ യഥാർത്ഥ തിരിച്ചറിയലോ അതിൽ ക്രൂഡ് ഓയിൽ തന്നെയാണോ എന്നതോ സ്ഥിരീകരിക്കാൻ കഴിഞ്ഞിട്ടില്ല. കപ്പലിന്റെ ഉടമസ്ഥത ദുബായ് ആസ്ഥാനമായ മുഹ്ത മാരിടൈം FZE, സഗിത മാരിടൈം കമ്പനി ലിമിറ്റഡ് എന്നീ കമ്പനികളാണെന്ന് രേഖകളിൽ കാണിച്ചിട്ടുണ്ടെങ്കിലും ഇവരുമായി ബന്ധപ്പെടാൻ കഴിഞ്ഞിട്ടില്ലെന്നാണ് റിപ്പോർട്ടുകൾ.

ആഗോള ഇന്ധന പ്രതിസന്ധി രൂക്ഷമായ സാഹചര്യത്തിൽ എണ്ണ എത്തിക്കാൻ വ്യത്യസ്ത മാർഗങ്ങൾ ഉപയോഗിക്കപ്പെടുന്നുണ്ടെന്നതിനുള്ള ഉദാഹരണമായി ഈ സംഭവം ചൂണ്ടിക്കാണിക്കപ്പെടുന്നു.

ഇതിനിടെ, ഹോർമുസ് കടലിടുക്ക് തുറക്കണമെന്ന് യുഎസ് സമ്മർദ്ദം തുടരുമ്പോഴും ഇറാൻ അത് തള്ളിക്കളഞ്ഞിട്ടുണ്ട്. 48 മണിക്കൂറിനകം പാത തുറന്നില്ലെങ്കിൽ ഇറാന്റെ ഊർജ കേന്ദ്രങ്ങൾ ആക്രമിക്കുമെന്നായിരുന്നു യുഎസ് മുന്നറിയിപ്പ്. മറുപടിയായി, തങ്ങൾക്കും തിരിച്ചടിയുണ്ടാകുമെന്ന് ഇറാൻ മുന്നറിയിപ്പ് നൽകി. ആവശ്യമായാൽ ഹോർമുസ് പൂർണമായും അടയ്ക്കുമെന്നും ഇറാൻ വ്യക്തമാക്കിയിട്ടുണ്ട്.

English Summary

A controversial “ghost tanker” reportedly passed through the Strait of Hormuz carrying crude oil, despite records showing it was scrapped years ago. The vessel “Nabeen” has raised suspicions of illegal fuel transport amid rising global tensions and energy shortages.