മലയാളത്തിൽ ഏറെ ഹിറ്റായ എക്കാലത്തെയും നല്ല ക്രൈം ത്രില്ലർ ചിത്രമായിരുന്നു ദൃശ്യം. ജീത്തു ജോസഫിന്റെ സംവിധാനത്തിൽ 2013ൽ പുറത്തിറങ്ങിയ ചിത്രം വൻവിജയമായിരുന്നു. പിന്നീട് വിവിധ ഭാഷകളിൽ ചിത്രം റീമേക്ക് ചെയ്തു.
മോഹൻലാലും മീനയും പ്രധാനവേഷങ്ങളിലെത്തിയ ചിത്രത്തിന്റെ രണ്ടാംഭാഗം 2021 ൽ ദൃശ്യം ദി റിസംഷൻ എന്ന പേരിൽ റിലീസ് ചെയ്തു. ഇതും വൻ വിജയമായിരുന്നു. അന്ന് മുതൽ തന്നെ മൂന്നാം ഭാഗത്തെ കുറിച്ച് ചർച്ചകൾ നടക്കുന്നുണ്ടായിരുന്നു.
മോഹൻലാൽ തന്റെ സോഷ്യൽ മീഡിയ അക്കൗണ്ടുകളിലൂടെയാണ് ദൃശ്യത്തിന്റെ മൂന്നാം ഭാഗം എത്തുമെന്ന് പ്രഖ്യാപിച്ചത്. ‘ഭൂതകാലം ഒരിക്കലും നിശബ്ദമായിരിക്കില്ല’ എന്ന ടാഗ് ലൈനോടുകൂടിയാണ് വിവരം പുറത്തുവിട്ടത്. ഒപ്പം ജിത്തു ജോസഫ്, ആന്റണി പെരുമ്പാവൂർ എന്നിവർക്കൊപ്പം നിൽക്കുന്ന ചിത്രവും പോസ്റ്റ് ചെയ്തിട്ടുണ്ട്.
ചിത്രത്തിന്റെ തിരക്കഥ നേരത്തെ തന്നെ ജിത്തു ജോസഫ് തയാറാക്കിയിരുന്നു. പ്രേക്ഷകരെ ആകാംഷയുടെ മുൾമുനയിൽ നിർത്തുന്ന എന്തെല്ലാമാണ് ചിത്രത്തിൽ ഉണ്ടാവുക എന്നതിലാണ് ആകാംക്ഷ.
