തൊടുപുഴ: ഇടുക്കി ജലവൈദ്യുത പദ്ധതിയുടെ ഭാഗമായുള്ള മൂലമറ്റം വൈദ്യുതി നിലയത്തിലെ ജനറേറ്റർ തകരാറിൽ. ഇതോടെ വൈദ്യുതോൽപാദനം പൂർണരീതിയിലാക്കാൻ സാധിക്കാത്ത അവസ്ഥയിലാണ്.
മൂലമറ്റത്തെ മൂന്നാം നമ്പർ ജനറേറ്ററിന്റെ സ്പെറിക്കൽ വാൽവാണ് നിലവിൽ തകരാറിലായിരിക്കുന്നത്. പകരം വാൽവ് ഉള്ളതിനാൽ ഒരാഴ്ചക്കകം മാറ്റി സ്ഥാപിക്കാൻ കഴിയുമെന്ന പ്രതീക്ഷയിലാണ് ജനറേറ്റർ വിഭാഗം. വാൽവ് തകരാറിൽ ആയതോടെ ഒരു ജനറേറ്ററിന്റെ പ്രവർത്തനം പൂർണമായി നിലച്ചതായാണ് റിപ്പോർട്ട്.
മൂലമറ്റത്തുള്ള ആറ് ജനറേറ്ററുകളിൽ അഞ്ചെണ്ണമാണ് നിലവിൽ പ്രവർത്തിക്കുന്നത്. എന്നാൽ കേരളത്തിന്റെ വിവിധ ഇടങ്ങളിൽ ശക്തമായ വേനൽ മഴ ലഭിക്കുന്നതിനാൽ ജനറേറ്റർ തകരാർ വൈദ്യുത വിതരണത്തെ ബാധിക്കില്ലെന്ന് കെഎസ്ഇബി അധികൃതർ വ്യക്തമാക്കി.
കേരളത്തിൽ വൈദ്യുതി പ്രതിസന്ധി നിലവില്ലെന്നും അധികൃതർ പറഞ്ഞു. ഇന്നലെ മൂലമറ്റം വൈദ്യുതി നിലയത്തിൽ 5.07 ദശ ലക്ഷം യൂണിറ്റ് വൈദ്യുതിയാണ് ഉൽപാദിപ്പിച്ചത്.
നിലവിൽ സംസ്ഥാനത്തെ മൊത്ത വൈദ്യുതി ഉപയോഗം 92 .123 ദശ ലക്ഷം യൂണിറ്റാണ്. ഇതിൽ 76 .70 ദശലക്ഷം യൂണിറ്റ് വൈദ്യുതി പുറം സംസ്ഥാനങ്ങളിൽ നിന്ന് വാങ്ങുകയാണ്.
