ഗ്യാസ് ക്ഷാമത്തിനിടെ ഞെട്ടിക്കുന്ന സംഭവം; തലസ്ഥാനത്തെ ഹോട്ടലിൽ നിന്ന് മോഷ്ടിച്ചത് നിറ സിലിണ്ടർ
തിരുവനന്തപുരം: സംസ്ഥാനത്ത് പാചകവാതക ക്ഷാമത്തെക്കുറിച്ചുള്ള ആശങ്കകൾ നിലനിൽക്കുന്നതിനിടെ തലസ്ഥാന നഗരിയിൽ നിന്ന് ഗ്യാസ് സിലിണ്ടർ മോഷണം പോയതായി പരാതി. തിരുവനന്തപുരം ചാലയിലെ വി.എസ് ഹോട്ടലിൽ നിന്നാണ് നിറച്ച നിലയിലുണ്ടായിരുന്ന എൽപിജി സിലിണ്ടർ കവർന്നത്.
ഇന്ന് പുലർച്ചെ രണ്ടുമണിയോടെയാണ് സംഭവം നടന്നത്. ഹോട്ടലിന്റെ അടുക്കള ഭാഗം വഴി അകത്തുകയറിയ മോഷ്ടാവ് വൈദ്യുതി ഓഫ് ചെയ്തതിന് ശേഷമാണ് സിലിണ്ടർ എടുത്ത് കടന്നത്. സംഭവത്തിന്റെ സിസിടിവി ദൃശ്യങ്ങൾ പുറത്തുവന്നിട്ടുണ്ട്.
ദൃശ്യങ്ങളിൽ മോഷ്ടാവ് കയ്യിൽ കരുതിയിരുന്ന ചാക്ക് ഉപയോഗിച്ച് മുഖം മറയ്ക്കുകയും സിസിടിവി ക്യാമറ തിരിച്ച് വെക്കുകയും ചെയ്യുന്നുവെന്ന് വ്യക്തമാണ്. ഹോട്ടലിൽ മൂന്ന് സിലിണ്ടറുകളുണ്ടായിരുന്നുവെന്നും അതിൽ പുതിയതും ഉപയോഗിക്കാത്തതുമായ സിലിണ്ടറാണ് മോഷ്ടിക്കപ്പെട്ടത്.
രാവിലെ ഹോട്ടൽ തുറക്കാനെത്തിയപ്പോൾ വൈദ്യുതി ഓഫ് ആയിരിക്കുന്നതും പരിശോധന നടത്തിയപ്പോഴാണ് സിലിണ്ടർ കാണാതായതും ശ്രദ്ധയിൽപ്പെട്ടത്. മോഷണത്തെ തുടർന്ന് എൽപിജി ലഭ്യമല്ലാതായതിനാൽ ഹോട്ടൽ താൽക്കാലികമായി അടയ്ക്കേണ്ട സാഹചര്യമാണെന്ന് ഉടമ അർച്ചന മാധ്യമങ്ങളോട് പറഞ്ഞു.
സംഭവത്തിൽ പോലീസിൽ പരാതി നൽകുമെന്നും പ്രദേശവാസിയായ ഒരാളെ സംശയിക്കുന്നതായും ഹോട്ടൽ ഉടമ അറിയിച്ചു.
English Summary
A gas cylinder was reportedly stolen from a hotel in Thiruvananthapuram amid concerns about LPG shortages in the state.
