‘എനിക്ക് എന്തിനാ ദൈവം ഇത്ര സൗന്ദര്യം തന്നത്’; സൗന്ദര്യം ശാപമായി മാറി; ഗാലക്സി തവളകൾ വംശനാശഭീഷണിയിൽ; എല്ലാത്തിനും കാരണം ഫോട്ടോഗ്രാഫി

നക്ഷത്രങ്ങളാൽ അലങ്കരിച്ച ആകാശത്തെ ഓർമ്മിപ്പിക്കുന്ന ശരീരസൗന്ദര്യമുള്ള പശ്ചിമഘട്ടത്തിലെ അപൂർവ ‘ഗാലക്സി തവളകൾ’ മനുഷ്യ ഇടപെടലുകളാൽ ഗുരുതര ഭീഷണിയിലാകുന്നതായി പഠനം.

കേരളത്തിലെ ഒരു ഗവേഷണ കേന്ദ്രത്തിൽ നിരീക്ഷണത്തിലുണ്ടായിരുന്ന ഏഴ് ഗാലക്സി തവളകൾ, അശാസ്ത്രീയ വന്യജീവി ഫോട്ടോഗ്രാഫി മൂലം പൂർണമായും അപ്രത്യക്ഷമായതായി അന്താരാഷ്ട്ര പരിസ്ഥിതി ജേണലായ ഹെർപ്പറ്റോളജി നോട്ട്സ് പ്രസിദ്ധീകരിച്ച റിപ്പോർട്ട് വ്യക്തമാക്കുന്നു.

2020 മാർച്ചിൽ ഗവേഷകർ കണ്ടെത്തിയ തവളകളെ തുടർനിരീക്ഷണത്തിനായി 2021 ഓഗസ്റ്റിൽ വീണ്ടും സന്ദർശിച്ചപ്പോഴാണ് അവയുടെ ആവാസവ്യവസ്ഥ പൂർണമായും നശിച്ച നിലയിൽ കണ്ടെത്തിയത്.

തവളകൾ പാർത്തിരുന്ന ഏകദേശം 25 മരത്തടികൾ മറിച്ചിട്ട നിലയിലായിരുന്നു. ചുറ്റുപാടുള്ള ചെടികൾ ചവിട്ടി നശിപ്പിക്കപ്പെട്ടിരുന്നു.

മികച്ച ചിത്രങ്ങൾ ലഭിക്കുന്നതിനായി ഫോട്ടോഗ്രാഫർമാരുടെ സംഘങ്ങൾ ഈ പ്രദേശം ആവർത്തിച്ച് സന്ദർശിച്ചതായി നാട്ടുകാർ ഗവേഷകരെ അറിയിച്ചു.

തവളകളെ കണ്ടെത്താനായി മരത്തടികൾ മറിച്ചിട്ട് പഴയപടി തിരികെ വെക്കാത്തത് അവയുടെ താവളം ഇല്ലാതാക്കുന്നതിന് കാരണമായി.

രാത്രികാലങ്ങളിൽ ശക്തമായ ഫ്ലാഷ് ഉപയോഗിക്കുന്നത് തവളകളിൽ കടുത്ത മാനസിക സമ്മർദ്ദവും നിർജ്ജലീകരണവും ഉണ്ടാക്കുന്നു.

മനുഷ്യർ നേരിട്ട് സ്പർശിക്കുന്നതിലൂടെ മാരക രോഗാണുക്കൾ ഇവയുടെ ശരീരത്തിലേക്ക് പടരാനുള്ള സാധ്യതയും വർധിക്കുന്നു. ഫോട്ടോഗ്രാഫിക്കിടയിൽ രണ്ട് തവളകൾ ചത്തതായും പഠനം ചൂണ്ടിക്കാട്ടുന്നു.

പശ്ചിമഘട്ടത്തിലെ ഉയർന്ന ചോലവനങ്ങളിൽ മാത്രം കാണപ്പെടുന്ന ഈ തവളകൾക്ക് 2 മുതൽ 3.5 സെന്റീമീറ്റർ വരെ മാത്രമാണ് വലിപ്പം.

‘എഡ്ജ്’ (Evolutionarily Distinct and Globally Endangered) വിഭാഗത്തിൽ ഉൾപ്പെടുന്ന ഇവ വംശനാശ ഭീഷണി നേരിടുന്ന അതീവ പ്രധാന ജീവിവർഗ്ഗമാണ്.

2021-ൽ മതികെട്ടാൻ ചോല ദേശീയോദ്യാനത്തിന്റെ ഔദ്യോഗിക ലോഗോയായും ഗാലക്സി തവളയെ തെരഞ്ഞെടുത്തിരുന്നു.

പ്രകൃതി ഫോട്ടോഗ്രാഫി വന്യജീവി സംരക്ഷണത്തിന് സഹായകരമായേക്കാമെങ്കിലും, അത് ജീവികളുടെ ആവാസവ്യവസ്ഥ തകർക്കുന്ന രീതിയിലാകരുതെന്ന് പഠനത്തിന് നേതൃത്വം നൽകിയ ഡോ. കെ.പി. രാജ്കുമാർ മുന്നറിയിപ്പ് നൽകി.

വന്യജീവി ഫോട്ടോഗ്രാഫർമാർക്കായി കർശനമായ പെരുമാറ്റച്ചട്ടം രൂപീകരിക്കണമെന്നും, ലംഘനങ്ങൾക്കെതിരെ ശക്തമായ നടപടികൾ സ്വീകരിക്കണമെന്നും ഗവേഷകർ ആവശ്യപ്പെട്ടു.

English Summary

A study published in Herpetology Notes warns that rare Galaxy Frogs of the Western Ghats have disappeared due to irresponsible wildlife photography. Researchers found that habitat destruction, excessive flash use, and human handling caused severe stress and mortality, pushing the endangered species closer to extinction.

galaxy-frog-western-ghats-threat-wildlife-photography

Galaxy Frog, Western Ghats, Wildlife Conservation, Environmental Study, Herpetology Notes, Kerala Biodiversity