ജൂനിയർ ഡോക്ടർക്ക് നേരെ ആക്രമണം
തൃശ്ശൂർ: തൃശ്ശൂർ ഗവ. മെഡിക്കൽ കോളേജ് ആശുപത്രിയിൽ വനിതാ ജൂനിയർ ഡോക്ടറെ ആക്രമിച്ചെന്ന പരാതിയെ തുടർന്ന് ഏഴ് നഴ്സുമാർക്കെതിരെ നടപടിയെടുക്കാൻ ഉത്തരവ്. ഇ.എൻ.ടി. വിഭാഗത്തിലെ ഡോക്ടർക്ക് നേരെയാണ് ജോലി സമയത്ത് ആക്രമണം ഉണ്ടായത്.
സംഭവ ദിവസം ഡ്യൂട്ടിയിലുണ്ടായിരുന്ന നഴ്സുമാരെ രണ്ട് ദിവസത്തേക്ക് ഡ്യൂട്ടിയിൽ നിന്ന് മാറ്റി നിർത്താനാണ് ആശുപത്രി സൂപ്രണ്ടിന്റെ ഉത്തരവ്.
കേരള മെഡിക്കൽ പോസ്റ്റ് ഗ്രാജ്വേറ്റ് അസോസിയേഷൻ ആശുപത്രി സൂപ്രണ്ടിന് നൽകിയ പരാതിയുടെ അടിസ്ഥാനത്തിൽ നടത്തിയ അന്വേഷണത്തെ തുടർന്നാണ് നടപടി.
സൂപ്രണ്ട് നിയോഗിച്ച അന്വേഷണ കമ്മിറ്റിയുടെ ശുപാർശ പ്രകാരമാണ് നഴ്സുമാരെ ഡ്യൂട്ടിയിൽ നിന്ന് മാറ്റി നിർത്താൻ തീരുമാനിച്ചത്.
രണ്ട് ദിവസത്തെ ഈ അവധി, ലീവ് അല്ലെങ്കിൽ ഓഫ് ആയി കണക്കാക്കില്ലെന്നും മൂന്നാം ദിവസം സൂപ്രണ്ടിന്റെ അനുമതിയോടെ മാത്രമേ ജോലിയിൽ പ്രവേശിക്കാൻ പാടുള്ളൂ എന്നും ഉത്തരവിൽ വ്യക്തമാക്കിയിട്ടുണ്ട്.
അതേസമയം സൂപ്രണ്ടിന്റെ നടപടി കാരണം രണ്ട് ദിവസം ഇ.എൻ.ടി. വിഭാഗത്തിൽ ഏഴ് നഴ്സുമാര് ജോലിക്കെത്തിയില്ല. തങ്ങളുടെ ഭാഗം കേൾക്കാതെയാണ് സൂപ്രണ്ട് ഈ ഏകപക്ഷീയമായ തീരുമാനം എടുത്തതെന്ന് നഴ്സുമാർ ആരോപിച്ചു.
സംഭവത്തിൽ ശിക്ഷ ലഭിച്ച നഴ്സുമാർ നഴ്സസ് യൂണിയന് പരാതിയും നൽകിയിട്ടുണ്ട്.
അനധികൃതമായി വിട്ടുനിന്നു: 51 ഡോക്ടര്മാരെ സർവീസിൽ നിന്ന് പിരിച്ചുവിട്ട് സർക്കാർ
തിരുവനന്തപുരം: അനധികൃതമായി സേവനങ്ങളില് നിന്നു വിട്ടുനില്ക്കുന്ന 51 ഡോക്ടര്മാരെ സര്വീസില് നിന്നു സംസ്ഥാന സർക്കാർ പിരിച്ചുവിട്ടു. മെഡിക്കല് വിദ്യാഭ്യാസ വകുപ്പിന് കീഴിലുള്ള ഡോക്ടർമാർക്കെതിരെയാണ് നടപടി.
പല തവണ അവസരം നല്കിയിട്ടും സര്വീസില് പ്രവേശിക്കുന്നതിന് താല്പര്യം പ്രകടിപ്പിക്കാത്ത ജീവനക്കാരെയാണ് പിരിച്ചു വിട്ടതെന്ന് ആരോഗ്യമന്ത്രി വീണാ ജോര്ജ് അറിയിച്ചു.
അനധികൃതമായി ജോലിക്ക് ഹാജരാകാത്ത ജീവനക്കാരെ കണ്ടെത്തി റിപ്പോര്ട്ട് നല്കുന്നതിനും കര്ശനമായ അച്ചടക്ക നടപടി സ്വീകരിക്കുന്നതിനും ആരോഗ്യ വകുപ്പിന് നിർദേശം നല്കിയിരുന്നു. ഇതിനു പിന്നാലെയാണ് നടപടി.
ഇത്രയും കാലം ഡോക്ടര്മാര് സര്വീസില് നിന്നു വിട്ടുനില്ക്കുന്നത് വകുപ്പിന്റെ പ്രവര്ത്തനത്തെ പ്രതികൂലമായി ബാധിക്കും.
ഇതിനു പുറമേ ഇത്തരം ജീവനക്കാരെ സര്വീസില് തുടരാനനുവദിക്കുന്നത് സേവനതല്പരരായ അര്ഹരായ ഉദ്യോഗാർഥികള്ക്ക് അവസരം നഷ്ടപ്പെടുത്തുന്നതിന് ഇടയാക്കുകയും ചെയ്യും. അതുകൊണ്ടാണ് കര്ശന നടപടി സ്വീകരിച്ചതെന്ന് അധികൃതര് അറിയിച്ചു.
Summary: Following a complaint of assault on a female junior doctor in the ENT department at Thrissur Government Medical College Hospital, action has been ordered against seven nurses. The incident occurred during duty hours and has raised serious concerns about staff conduct and workplace safety in the hospital.
