ബ്രിട്ടനിൽ ഫ്ലൂ വ്യാപനം രൂക്ഷം; അതിതീവ്ര വ്യാപനമെന്ന് ആരോഗ്യവിദഗ്ധർ
ലണ്ടൻ: ബ്രിട്ടനിലെ പൊതുജനാരോഗ്യ രംഗത്ത് വീണ്ടും ആശങ്ക ഉയർത്തുന്ന സാഹചര്യമാണ് രൂപപ്പെട്ടിരിക്കുന്നത്. കോവിഡ് മഹാമാരിയെ ഓർമ്മിപ്പിക്കുന്നവിധം രാജ്യത്തുടനീളം ഫ്ലൂ ബാധിതരുടെ എണ്ണം വൻതോതിൽ വർധിച്ചു.
അതിവ്യാപന ശേഷിയുള്ള വൈറസ് വകഭേദങ്ങൾ പടരുന്നതിനോടൊപ്പം ചികിത്സ തേടി ആശുപത്രികളിലെത്തുന്നവർ ദിനംപ്രതി ഉയരുന്നതോടെ എൻഎച്ച്എസ് ആശുപത്രികൾ കടുത്ത പ്രവർത്തന പ്രതിസന്ധിയിലാണ്.
നിലവിൽ റിപ്പോർട്ട് ചെയ്യപ്പെട്ട ഏറ്റവും വ്യാപകമായ വൈറസ് വകഭേദം സൂപ്പർ ഫ്ലൂ എന്നറിയപ്പെടുന്ന ഇൻഫ്ലുവൻസ H3N2 ആണ്.
ഈ വൈറസ് കുടുംബത്തിലേക്ക് പെട്ട ഫ്ലൂ ബാധക്ക് വലിയ തോതിൽ ആളുകൾ കീഴടങ്ങുകയാണ്. ദിവസേന പതിനായിരക്കണക്കിനു പേർ ആശുപത്രികളിൽ ചികിത്സ തേടിയെത്തുന്നതിനാൽ അടിയന്തര വിഭാഗങ്ങളുടെ പ്രവർത്തന ശേഷി തന്നെ പരീക്ഷിക്കപ്പെടുകയാണ്.
കണക്കുകൾ പ്രകാരം, കഴിഞ്ഞ ആഴ്ചയിൽ മാത്രം ഓരോ എൻഎച്ച്എസ് ആശുപത്രിയിലും ശരാശരി 1,700 പേർ ഫ്ലൂ ബാധയെ തുടർന്ന് ചികിത്സ തേടിയെത്തി.
കോവിഡ് കാലത്തെ തിരക്കിനും സമ്മർദത്തിനുമൊത്തതായ ഒരു സാഹചര്യമാണ് ഇതിലൂടെ വീണ്ടും സൃഷ്ടിക്കപ്പെട്ടതെന്ന് ആരോഗ്യ വിദഗ്ധർ മുന്നറിയിപ്പ് നൽകുന്നു.
പ്രായമായവരുടെ ജീവൻ സംരക്ഷിക്കുന്നതിനുള്ള ചികിത്സയിൽ ഒഴിച്ചുകൂടാനാകാത്ത ശ്രദ്ധ ആവശ്യമാണ് എന്നും ഇംഗ്ലണ്ടിന്റെ ചീഫ് മെഡിക്കൽ ഓഫിസർ സർ ക്രിസ് വിറ്റി വ്യക്തമാക്കി.
ബ്രിട്ടനിൽ ഫ്ലൂ വ്യാപനം രൂക്ഷം; അതിതീവ്ര വ്യാപനമെന്ന് ആരോഗ്യവിദഗ്ധർ
ഇതിനിടെ, ചെറിയ ചുമ, ജലദോഷം തുടങ്ങിയ നേരിയ രോഗലക്ഷണങ്ങൾ മാത്രം ഉണ്ടായിരിക്കുമ്പോൾ തന്നെ ആളുകൾ വലിയ തോതിൽ എമർജൻസി കെയർ വിഭാഗങ്ങളിലേക്ക് ഒഴുകിയെത്തുന്നതും വലിയ പ്രശ്നമാകുന്നു.
ഈ രീതിയിൽ അടിയന്തര വിഭാഗം ഉപയോഗിക്കുന്നത് അനാവശ്യ തിരക്കും ആരോഗ്യപ്രവർത്തകരുടെ സമയ നഷ്ടവും ഉണ്ടാക്കുന്നുവെന്നാണ് എൻഎച്ച്എസ് ഉദ്യോഗസ്ഥരുടെ മുന്നറിയിപ്പ്.
കഴിഞ്ഞ നവംബർ മുതൽ ഫെബ്രുവരി വരെ ഉണ്ടായ 200,000-ത്തിലധികം A&E സന്ദർശനങ്ങളിൽ പലതും ജിപിയിലൂടെയോ ഹെൽപ്ലൈൻ വഴിയോ ഫാർമസി കൗണ്ടർ വഴിയോ പരിഹരിക്കാവുന്നവ ആയിരുന്നുവെന്നാണ് റിപ്പോർട്ട്.
ആശുപത്രികളുടെ നിർണായക സമയവും സൗകര്യങ്ങളും വെറുതെ വിനിയോഗിക്കപ്പെടുന്നത് ആരോഗ്യ മേഖലയ്ക്ക് ഗുരുതരമായ ആഘാതം സൃഷ്ടിക്കുന്നുണ്ടെന്ന വിമർശനവും ഉയർന്നിട്ടുണ്ട്.
ഫ്ലൂ രോഗികളുടെ എണ്ണത്തിൽ തന്നെ എൻഎച്ച്എസ് നിലവിൽ ദുരിതമനുഭവിക്കുമ്പോൾ, അടുത്തയാഴ്ച മുതൽ ആരംഭിക്കുന്ന ജൂനിയർ ഡോക്ടർമാരുടെ സമരം പ്രശ്നം കൂടുതൽ വഷളാക്കുമെന്നാണ് വിലയിരുത്തൽ.
ബ്രിട്ടിഷ് മെഡിക്കൽ അസോസിയേഷൻ ശമ്പള വർധന ആവശ്യപ്പെട്ട് ഡിസംബർ 17 മുതൽ തുടർച്ചയായി അഞ്ച് ദിവസം നീളുന്ന വാക്ക്-ഔട്ട് സമരത്തിന് തയ്യാറെടുക്കുകയാണ്.
ആരോഗ്യപ്രവർത്തകർ പണിമുടക്കിനിറങ്ങുന്ന സാഹചര്യത്തിൽ, ഇതിനകം തന്നെ സമ്മർദം അനുഭവിക്കുന്ന എൻഎച്ച്എസ് ആശുപത്രികളുടെ പ്രവർത്തനം കൂടുതൽ തകരാനുള്ള സാഹചര്യമാണെന്ന് ആരോഗ്യ നിരീക്ഷകർ മുന്നറിയിപ്പ് നൽകുന്നു.
രാജ്യത്ത് വൈറസ് വ്യാപനം തടയാനും പൊതുജനാരോഗ്യം സംരക്ഷിക്കാനും മാസ്ക് ധരിക്കൽ, കൈ കഴുകൽ, തിരക്കേറിയ ഇടങ്ങൾ ഒഴിവാക്കൽ തുടങ്ങിയ മുൻകരുതൽ നടപടികൾ കർശനമായി പാലിക്കണമെന്ന് ആരോഗ്യമേഖലയിലെ വിദഗ്ധർ ആവശ്യപ്പെടുന്നു.
ശീതകാലത്തെ ഈ വൈറസ് വ്യാപനം ഫലപ്രദമായി നിയന്ത്രിക്കാൻ പൊതുജനങ്ങളുടെ സഹകരണം നിർണായകമാണെന്നും അവർ വ്യക്തമാക്കുന്നു.
