തിരുവനന്തപുരം: ദീപാവലി ആഘോഷത്തിനിടെ അമിട്ട് പൊട്ടിത്തെറിച്ച് അപകടം. യുവാവിന്റെ കൈപ്പത്തി തകര്‍ന്നു. മുല്ലൂര്‍ തലയ്‌ക്കോട് സ്വദേശി നയന്‍ പ്രഭാതിന്റെ (20) വലതുകൈപ്പത്തിയാണ് തകർന്നത്. തിരുവനന്തപുരം വിഴിഞ്ഞത്താണ് സംഭവം.(fire cracker explosion during Diwali celebration; 20-year-old youth’s palm was broken)
അപകടത്തെ തുടർന്ന് മാംസഭാഗങ്ങള്‍ വേര്‍പെട്ട യുവാവിന്റെ കൈപ്പത്തി ശസ്ത്രക്രിയയിലൂടെ നീക്കം ചെയ്തു. ഇന്നലെ രാത്രിയാണ് ദാരുണ സംഭവം ഉണ്ടായത്. നയനും സുഹൃത്തുക്കളും വീട്ട് മുറ്റത്ത് പടക്കങ്ങള്‍ പൊട്ടിച്ച് ദീപാവലി ആഘോഷിക്കുകയായിരുന്നു. ഇതിനിടെ ഒരു അമിട്ട് കത്തിച്ച് റോഡിലേയ്ക്ക് എറിഞ്ഞെങ്കിലും പൊട്ടിയില്ല. കുറച്ചു സമയങ്ങൾക്ക് ശേഷം ഇതുവഴി ലോറി വരുന്നത് കണ്ട് അമിട്ട് എടുത്തു മാറ്റാന്‍ ശ്രമിക്കുന്നതിനിടെ പൊട്ടിത്തെറിക്കുകയായിരുന്നു.
കൈയ്ക്ക് ഗുരുതരമായി പരിക്കേറ്റ നയനെ ഉടന്‍ തന്നെ സുഹൃത്തുക്കളും ബന്ധുക്കളും ചേര്‍ന്ന് നെയ്യാറ്റിന്‍കരയിലെ ആശുപത്രിയില്‍ എത്തിച്ചു. കൈപ്പത്തിയില്‍ നിന്ന് വേര്‍പെട്ട ഭാഗങ്ങള്‍ തുന്നിച്ചേര്‍ക്കാന്‍ കഴിയാത്ത അവസ്ഥയിലായിരുന്നു. ഇതോടെയാണ് ബന്ധുക്കളുടെ സമ്മതത്തോടെ യുവാവിന്റെ കൈപ്പത്തി മുറിച്ചു നീക്കിയത്.
