രാജ്യത്ത് റോഡപകടമരണങ്ങൾ കുത്തനെ കൂടുകയാണെന്നും മറ്റു രാജ്യങ്ങളുടെ മുന്നിൽ തലകുനിക്കേണ്ട അവസ്ഥയാണെന്നും കേന്ദ്ര ഗതാഗതമന്ത്രി നിതിൻ ഗഡ്കരി. ചുമതലയേൽക്കുമ്പോൾ വാഹനാപകടങ്ങൾ 50 ശതമാനമായി കുറയ്ക്കാനാണ് ലക്ഷ്യമിട്ടിരുന്നത്. എന്നാൽ അപകടങ്ങൾ കൂടുകയാണുണ്ടായതെന്ന് ലോക്‌സഭയിലെ ചോദ്യോത്തരവേളയിൽ മന്ത്രി പറഞ്ഞു.
നിലവിൽ അന്താരാഷ്ട്രസമ്മേളനങ്ങളിൽ പങ്കെടുക്കുമ്പോൾ മുഖം മറച്ചുപിടിക്കേണ്ട അവസ്ഥയാണെന്നും കേന്ദ്ര ഗതാഗതമന്ത്രി നിതിൻ ഗഡ്കരി പറഞ്ഞു. പ്രതിവർഷം രാജ്യത്ത് 1.78 ലക്ഷം ആളുകളാണ് റോഡപകടങ്ങളിൽ മരിക്കുന്നത്. ഇതിൽ 60 ശതമാനവും 18-നും 34-നും ഇടയിൽ പ്രായമുള്ളവരാണ്. അപകടങ്ങളിൽ 13.13 ശതമാനവും ഉത്തർപ്രദേശിലാണ് നടക്കുന്നത്.
ഉത്തർപ്രദേശിൽ മാത്രം 2013-22 കാലയളവിൽ 1.97 ലക്ഷം അപകടങ്ങളാണ് നടന്നത്. ഇക്കാലയളവിൽ 1.65 ലക്ഷം അപകടങ്ങൾ റിപ്പോർട്ട് ചെയ്ത തമിഴ്നാടാണ് രണ്ടാം സ്ഥാനത്ത്. കേരളത്തിൽ ഇക്കാലയളവിൽ 40,389 അപകടങ്ങളുണ്ടായി. അപകടത്തിൽപ്പെടുന്നവർക്ക് നിശ്ചിതസമയത്തിനുള്ളിൽ സൗജന്യചികിത്സ ലഭ്യമാക്കുന്നതിനുള്ള കേന്ദ്രസർക്കാരിന്റെ പദ്ധതി മൂന്നുമാസത്തിനുള്ളിൽ മുഴുവൻ സംസ്ഥാനത്തും നടപ്പാക്കുമെന്നും മന്ത്രി പറഞ്ഞു.
രാജ്യത്തെ റോഡ് അപകടങ്ങൾക്കു കാരണം അച്ചടക്കമില്ലാത്ത ഡ്രൈവിങ്ങാണെന്നു കേന്ദ്ര മന്ത്രി കൂട്ടിച്ചേർത്തു. ട്രാഫിക് നിയമങ്ങൾ പാലിക്കാത്തതിനു മുംബൈയിൽ രണ്ടു വട്ടം തന്റെ കാറിനും പിഴയിട്ടിട്ടുണ്ടെന്നും അദ്ദേഹം ലോക്‌സഭയിൽ പറഞ്ഞു. ശൂന്യവേളയിൽ റോഡ് അപകടങ്ങളെക്കുറിച്ചുള്ള ചർച്ചയിൽ സംസാരിക്കുകയായിരുന്നു മന്ത്രി.
ലോകത്തിലെല്ലായിടത്തും വേഗത്തിൽ വാഹനമോടിക്കുന്നവരുണ്ട്. എന്നാൽ വേഗമല്ല, യഥാർഥ പ്രശ്‌നം ‘ലെയ്ൻ അച്ചടക്കം’ പാലിക്കാത്തതാണ്. പാതയോരത്ത് ട്രക്ക് പാർക്ക് ചെയ്യുന്നതും പ്രശ്‌നമാണ്. റോഡ് അപകടങ്ങളെക്കുറിച്ചുള്ള അന്താരാഷ്ട്ര സമ്മേളനങ്ങളിൽ പങ്കെടുക്കുമ്പോൾ താൻ മുഖം ഒളിപ്പിക്കാൻ ശ്രമിക്കാറുണ്ടെന്നും അദ്ദേഹം.
