യുഎഇയിലെ ആമസോൺ ഡേറ്റാ സെന്ററിൽ സ്ഫോടനം
യുഎഇയിലെ ആമസോൺ വെബ് സർവീസസിന്റെ (AWS) ഡേറ്റാ സെന്ററിനുനേരെ അജ്ഞാത വസ്തു പതിച്ചതിനെത്തുടർന്ന് ആക്രമണമുണ്ടായെന്ന വാർത്തകൾ മിഡിൽ ഈസ്റ്റിൽ വലിയ ആശങ്ക പരത്തിയിരിക്കുകയാണ്.
പുലർച്ചെ 4:30-ഓടെയാണ് സംഭവം നടന്നതെന്ന് കരുതപ്പെടുന്നു. ആമസോണിന്റെ ക്ലൗഡ് കമ്പ്യൂട്ടിംഗ് വിഭാഗമായ എഡബ്ല്യുഎസ് ഇതിനോടകം തന്നെ തങ്ങളുടെ ഡേറ്റാ സെന്ററിലുണ്ടായ തീപ്പിടിത്തവും തുടർന്നുണ്ടായ പ്രവർത്തന തടസ്സവും സ്ഥിരീകരിച്ചിട്ടുണ്ട്.
അജ്ഞാത വസ്തു പതിച്ചതിനെത്തുടർന്ന് വലിയ തോതിൽ തീയും പുകയും ഉണ്ടായതായാണ് റോയിട്ടേഴ്സ് ഉൾപ്പെടെയുള്ള അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നത്.
പശ്ചിമേഷ്യയിൽ ഇറാനും അമേരിക്കയും ഇസ്രായേലും തമ്മിൽ നിലനിൽക്കുന്ന കടുത്ത സൈനിക സംഘർഷങ്ങളുടെ പശ്ചാത്തലത്തിലാണ് ഈ നീക്കം എന്നതും ഗൗരവകരമാണ്.
ഇറാനിൽ നിന്നുള്ള മിസൈൽ – ഡ്രോൺ ആക്രമണങ്ങൾ യുഎഇ നേരിടുന്ന സമയത്താണ് ഈ സംഭവം റിപ്പോർട്ട് ചെയ്യപ്പെട്ടിരിക്കുന്നത്.
മേഖലയിലെ വിമാനത്താവളങ്ങൾക്കും തുറമുഖങ്ങൾക്കും നേരത്തെ തന്നെ നാശനഷ്ടങ്ങൾ സംഭവിച്ചിരുന്നു.
എന്നാൽ ഈ പ്രത്യേക ഡേറ്റാ സെന്റർ തകരാറും സൈനിക നീക്കങ്ങളും തമ്മിൽ നേരിട്ട് ബന്ധമുണ്ടോ എന്ന കാര്യത്തിൽ ഔദ്യോഗികമായ സ്ഥിരീകരണം നൽകാൻ ആമസോൺ ഇതുവരെ തയ്യാറായിട്ടില്ല.
സുരക്ഷാ മുൻകരുതലുകളുടെ ഭാഗമായി തകരാർ സംഭവിച്ച ഡേറ്റാ സെന്ററിലേക്കുള്ള വൈദ്യുതി വിതരണം താൽക്കാലികമായി വിച്ഛേദിച്ചിരിക്കുകയാണ്.
പ്രാദേശിക അഗ്നിശമന സേനയുടെ നിർദ്ദേശപ്രകാരമാണ് ഈ നടപടി. ഒന്നിലധികം ഡാറ്റാ സെന്ററുകൾ ഉൾപ്പെടുന്ന ഒരു പ്രത്യേക ‘അവൈലബിലിറ്റി സോണിലാണ്’ (Availability Zone) ഈ ആഘാതം ഉണ്ടായിരിക്കുന്നത്.
ഇത്തരം സോണുകൾ സാധാരണയായി സേവന തടസ്സം ഒഴിവാക്കാനാണ് നിർമ്മിക്കാറുള്ളതെങ്കിലും, ഈ സംഭവത്തെത്തുടർന്ന് വലിയൊരു വിഭാഗം ഡിജിറ്റൽ സേവനങ്ങൾക്ക് തടസ്സം നേരിടാൻ സാധ്യതയുണ്ട്.
അഗ്നിശമന സേനയുടെ നേതൃത്വത്തിൽ തീ നിയന്ത്രണവിധേയമാക്കാനുള്ള ശ്രമങ്ങൾ ഊർജിതമായി നടക്കുകയാണ്.
മണിക്കൂറുകൾക്ക് ശേഷം മാത്രമേ പൂർണ്ണമായ തോതിൽ പ്രവർത്തനം പുനഃസ്ഥാപിക്കാൻ കഴിയൂ എന്നാണ് കമ്പനി വൃത്തങ്ങൾ നൽകുന്ന സൂചന.
യുഎഇയിലെ മറ്റ് മേഖലകളിലുള്ള ഡേറ്റാ സെന്ററുകൾക്ക് നിലവിൽ പ്രശ്നങ്ങളൊന്നുമില്ലെന്നും അവ സുരക്ഷിതമായി പ്രവർത്തിക്കുന്നുണ്ടെന്നും ആമസോൺ വ്യക്തമാക്കിയിട്ടുണ്ട്.
ഉപഭോക്താക്കളുടെ ഡാറ്റാ സുരക്ഷ ഉറപ്പാക്കുന്നതിനും സേവനം വേഗത്തിൽ ലഭ്യമാക്കുന്നതിനുമുള്ള ശ്രമങ്ങൾ പുരോഗമിക്കുകയാണ്.
സൈനിക പ്രകോപനങ്ങൾ സാങ്കേതിക വിദ്യയെയും ഡിജിറ്റൽ അടിസ്ഥാന സൗകര്യങ്ങളെയും ബാധിക്കുന്നത് ആഗോള സാമ്പത്തിക രംഗത്ത് വലിയ പ്രത്യാഘാതങ്ങൾ ഉണ്ടാക്കുമെന്ന് നിരീക്ഷകർ വിലയിരുത്തുന്നു.
യുഎഇ അടക്കമുള്ള രാജ്യങ്ങൾ തങ്ങളുടെ പ്രധാന ഡിജിറ്റൽ കേന്ദ്രങ്ങളുടെ സുരക്ഷ വർധിപ്പിക്കുന്നതിനെക്കുറിച്ച് ആലോചിക്കുകയാണ്.
വരും മണിക്കൂറുകളിൽ കൂടുതൽ വ്യക്തത ലഭിച്ചാൽ മാത്രമേ ഇത് ഒരു സൈനിക ആക്രമണമാണോ അതോ മറ്റ് സാങ്കേതിക കാരണങ്ങളാൽ ഉണ്ടായതാണോ എന്ന് ഉറപ്പിക്കാൻ സാധിക്കൂ.
