ആന എഴുന്നള്ളിപ്പ്; ഹൈക്കോടതിയിൽ നിലപാടറിയിച്ച് സർക്കാർ

വെടിക്കെട്ട് സ്ഥലവും ആനകളും തമ്മിലുള്ള ദൂരപരിധി നിശ്ചയിക്കാനുള്ള അധികാരവും ജില്ലാതല സമിതിയ്ക്ക് നൽകണം

എറണാകുളം: ആന എഴുന്നള്ളിപ്പിൽ ഹൈക്കോടതിയുടെ നിയന്ത്രണങ്ങളിൽ നിലപാടറിയിച്ച് സംസ്ഥാന സർക്കാർ. ആനകൾ തമ്മിലുള്ള ദൂരപരിധി പൊതുവായി നിശ്ചയിക്കുന്നത് അപ്രായോഗികമാണെന്ന് സർക്കാർ ഹൈക്കോടതിയെ അറിയിച്ചു. വിഷയത്തിൽ ജില്ലാതല നിരീക്ഷക സമിതി തീരുമാനമെടുക്കുന്നതാണ് ഉചിതമെന്നും സർക്കാർ സത്യവാങ്മൂലം സമർപ്പിച്ചു.(Elephant procession; government submitted affidavit in High Court)

എഴുന്നള്ളിപ്പ് സമയത്ത് ആനകൾ തമ്മിലുള്ള ദൂരപരിധിയടക്കം പൊതുവായി നിശ്ചയിച്ചുകൊണ്ട് ഏകീകരിച്ച ഉത്തരവിറക്കുന്നതിൽ ഹൈക്കോടതി നിലപാട് അറിയിക്കാൻ ആവശ്യപ്പെട്ട പശ്ചാത്തലത്തിലാണ് സർക്കാർ സത്യവാങ്മൂലം സമർപ്പിച്ചത്. ഭൂവിസ്‌തൃതി, സ്ഥല ലഭ്യത, ആനകളുടെ എണ്ണം ഉൾപ്പെടെ പരിഗണിക്കപ്പെടേണ്ട ഘടകങ്ങളാണെന്നും സർക്കാർ കോടതിയെ അറിയിച്ചു.

വെടിക്കെട്ട് സ്ഥലവും ആനകളും തമ്മിലുള്ള ദൂരപരിധി നിശ്ചയിക്കാനുള്ള അധികാരവും ജില്ലാതല സമിതിയ്ക്ക് നൽകണം എന്നും സർക്കാർ പറഞ്ഞു. തീവെട്ടി ഉൾപ്പെടെയുള്ളവയും ആനയും തമ്മിലുള്ള അകലവും ഇതിലുൾപ്പെടും. വെടിക്കെട്ട് നടക്കുന്ന സ്ഥലത്തെ പ്രാദേശിക സാഹചര്യമടക്കം ഇക്കാര്യത്തിൽ കണക്കിലെടുക്കേണ്ടി വരുമെന്നും സർക്കാർ ഹൈക്കോടതിയിൽ വ്യക്തമാക്കി.