പത്തനംതിട്ട: ട്രെയിൻ യാത്രക്കിടെ ദമ്പതികളെ ബോധം കെടുത്തി മോഷണം. പത്തനംതിട്ട വടശ്ശേരിക്കര തലച്ചിറ സ്വദേശികളായ പി. ഡി. രാജു (70), ഭാര്യ മറിയാമ്മ (68) എന്നിവരുടെ സാധനങ്ങളാണ് മോഷണം പോയത്. കൊല്ലം – വിശാഖപട്ടണം എക്സ്പ്രസിൽ വെള്ളിയാഴ്ച രാത്രിയാണ് സംഭവം.(Couple robbed in Kollam-Visakhapatnam express train)
ഇവരുടെ കയ്യിൽ ഉണ്ടായിരുന്ന ഫ്ലാസ്കിൽ നിന്നും വെള്ളം കുടിച്ചതിനു പിന്നാലെയാണ് ഇരുവരുടെയും ബോധം നഷ്ടപ്പെട്ടത്. സ്വർണാഭരണങ്ങളും മൊബൈൽ ഫോണുകളും ബാഗും ഉൾപ്പെടെയുള്ള വിലപിടിച്ച വസ്തുക്കളെല്ലാം മോഷ്ടാക്കൾ കവർന്നു. ബർത്തിന് അരികിൽ ഇവർ വെച്ചിരുന്ന ഫ്ലാസ്കിലെ വെള്ളത്തിൽ മയക്കുമരുന്ന് കലർത്തിയിരുന്നോ എന്നാണ് സംശയം.
ഇരുവരും വെല്ലൂർ സിഎംസി ആശുപത്രിയിൽ ചികിത്സയിൽ കഴിയുകയാണ്. സംഭവത്തിൽ കാട്പാടി റെയിൽവെ പോലീസിൽ പരാതി നൽകിയിട്ടുണ്ട്. തമിഴ്നാട് ഹൊസൂറിൽ സ്ഥിരതാമസക്കാരായ ദമ്പതികൾ നാട്ടിൽ വന്നു മടങ്ങി പോകുമ്പോഴാണ് മോഷണത്തിനിരയായത്.
