കോഴിക്കോട്: അവസരം വാഗ്ദാനം ചെയ്ത് ലൈംഗികാതിക്രമത്തിന് ഇരയാക്കിയെന്ന യുവാവിന്റെ പരാതിയില് സംവിധായകന് രഞ്ജിത്തിനെതിരെ കേസെടുത്ത് പോലീസ്. ജാമ്യമില്ലാ വകുപ്പ് പ്രകാരം കോഴിക്കോട് കസബ പൊലീസാണ് കേസ് രജിസ്റ്റര് ചെയ്തത്. ഐടി ആക്റ്റും രഞ്ജിത്തിനെതിരെ ചുമത്തി.(Complaint of sexual assault of young man; Police registered a case against Ranjith)
പ്രത്യേക അന്വേഷണസംഘത്തിലെ ഐശ്വര്യ ഡോങ്റെയുടെ നേതൃത്വത്തില് കഴിഞ്ഞ ദിവസം കോഴിക്കോട് കാരപ്പറമ്പില് എത്തി യുവാവില് നിന്ന് മൊഴി രേഖപ്പെടുത്തിയിരുന്നു. ആരോപണങ്ങങ്ങളില് ഉറച്ചുനില്ക്കുന്നെന്നും കൈയിലുള്ള തെളിവുകള് അന്വേഷണ സംഘത്തിന് കൈമാറുമെന്നും യുവാവ് അറിയിച്ചിരുന്നു. കേസ് പിന്വലിക്കാന് സമ്മര്ദവും ഭീഷണിയും ഉണ്ട്. സ്വാധീനിക്കാന് പലരും ശ്രമിക്കുന്നു. തനിക്ക് നീതിയാണ് ആവശ്യമെന്നും കൂടുതല് കാര്യങ്ങള് വെളിപ്പെടുത്താന് ഉണ്ടെന്നും യുവാവ് പറഞ്ഞിരുന്നു.
2012-ല് ആണ് സംഭവം. ഹോട്ടൽ മുറിയില്വെച്ച് രഞ്ജിത്ത് പീഡിപ്പിച്ചെന്നാണ് യുവാവിന്റെ പരാതി. ബാവൂട്ടിയുടെ നാമത്തില് എന്ന ചിത്രത്തിന്റെ ലൊക്കേഷനില് നടന്മാരെ കാണാന് പോയപ്പോഴാണ് രഞ്ജിത്തിനെ പരിചയപ്പെട്ടത്. അന്ന് പ്ലസ് ടു വിദ്യാര്ഥിയായിരുന്നു. പിന്നീട് ബെംഗളൂരുവിലെ പഞ്ചനക്ഷത്ര ഹോട്ടലില് വരാനാവശ്യപ്പെടുകയും അവിടെവെച്ച് സിനിമയില് അവസരം വാഗ്ദാനംചെയ്ത് മദ്യം നൽകുകയും ക്രൂരമായി പീഡിപ്പിക്കുകയും നഗ്ന ചിത്രം പകർത്തി പലർക്കും ഷെയർ ചെയ്യുകയും ചെയ്തുവെന്നാണ് രഞ്ജിത്തിനെതിരെയുള്ള യുവാവിന്റെ പരാതി.
