തീയറ്ററിൽ റീറിലീസ് ആഘോഷമാക്കി മോഹൻലാൽ ചിത്രം ഛോട്ടാ മുംബൈ. ജൂൺ ആറിന് തിയേറ്ററുകളിലെത്തിയ ചിത്രം ആദ്യ ദിനം തന്നെ ഫാൻ ഷോകളും ഹൗസ് ഫുൾ ഷോകളുമായാണ് പ്രദർശിപ്പിച്ചത്.
കവിത തീയറ്ററിൽ രാത്രി പന്ത്രണ്ട് മണിയ്ക്ക് വെച്ച എക്‌സ്ട്രാ ഷോ നിമിഷനേരം കൊണ്ടാണ് ഹൗസ്ഫുൾ ആയത്. കൂടാതെ സംസ്ഥാനത്തെ പല തിയേറ്ററുകളും ഛോട്ടാ മുംബൈ കൂടുതലായി ചാർട്ട് ചെയ്യാനും തുടങ്ങിയിട്ടുണ്ട്.
പുതുതായി വരുന്ന ഓരോ സ്‌ക്രീനും ഷോകളും അതിവേഗമാണ് ഹൗസ്ഫുൾ ആകുന്നത്. റിലീസ് ആഴ്ചയിൽ ചിത്രം മികച്ച കളക്ഷൻ സ്വന്തമാക്കുമെന്നാണ് ട്രാക്കേഴ്‌സിന്റെ കണക്ക് കൂട്ടൽ.
നേരത്തെ റീറിലീസായി തിയേറ്ററുകളിലെത്തിയ സ്ഫടികം, ദേവദൂതൻ, മണിച്ചിത്രത്താഴ് എന്നീ സിനിമകളും മികച്ച പ്രകടനം കാഴ്ചവെച്ചിരുന്നു. എമ്പുരാൻ, തുടരും എന്നീ വമ്പൻ വിജയങ്ങൾക്ക് പിന്നാലെയാണ് റീറിലീസിലും മോഹൻലാൽ തിയേറ്ററുകൾ ഇളക്കി മറിക്കുന്നത്.
സത്യൻ അന്തിക്കാട് സംവിധാനത്തിലെത്തുന്ന ഹൃദയപൂർവ്വം ആണ് മോഹൻലാലിന്റെ റിലീസ് കാത്തിരിക്കുന്ന പുതിയ ചിത്രം. ഓണത്തിനായിരിക്കും ചിത്രം തിയേറ്ററുകളിലെത്തുക. ഒപ്പം വൃഷഭ, കണ്ണപ്പ എന്നീ മറ്റ് ഭാഷാ ചിത്രങ്ങളും റിലീസിന് ഒരുങ്ങുന്നുണ്ട്.
