‘ചത്താ പച്ച’ ഒടിടിയിലെത്തി; മമ്മൂട്ടിയുടെ രംഗങ്ങളിൽ മാറ്റം വരുത്തിയെന്ന് സോഷ്യൽ മീഡിയ, ചർച്ചകൾ കൊഴുക്കുന്നു
അർജുൻ അശോകനും റോഷൻ മാത്യുവും കേന്ദ്രകഥാപാത്രങ്ങളായ ചത്താ പച്ച ഒടിടി റിലീസ് നേടി. നവാഗതനായ അദ്വൈത് നായർ സംവിധാനം ചെയ്ത ചിത്രം നെറ്റ്ഫ്ളിക്സിലൂടെയാണ് സ്ട്രീമിങ് ആരംഭിച്ചത്.
തിയേറ്ററിൽ ശ്രദ്ധ നേടിയ സിനിമ ഡിജിറ്റൽ പ്ലാറ്റ്ഫോമിലും അതേ സ്വീകാര്യത നേടുമോയെന്നതാണ് ആരാധകർ ഉറ്റുനോക്കുന്നത്.
ഡബ്ല്യുഡബ്ല്യുഇയിൽ നിന്ന് പ്രചോദനം ഉൾക്കൊണ്ട കഥയാണ് ചിത്രം പറയുന്നത്. കൊച്ചിയിൽ റസ്ലിംഗ് ആരംഭിക്കുന്ന യുവാക്കളുടെ സ്വപ്നങ്ങളും പരിശ്രമങ്ങളും സംഘർഷങ്ങളും കേന്ദ്രീകരിച്ചാണ് കഥ മുന്നേറുന്നത്.
ചിത്രത്തിലെ ശ്രദ്ധേയ ഘടകങ്ങളിൽ ഒന്നായിരുന്നു മമ്മൂട്ടിയുടെ അതിഥി വേഷം. ‘വാൾട്ടർ’ എന്ന ഗുസ്തി പരിശീലകനായാണ് താരം എത്തിയത്.
എന്നാൽ തിയേറ്റർ റിലീസിന് പിന്നാലെ മമ്മൂട്ടിയുടെ കാമിയോയ്ക്ക് മിശ്ര പ്രതികരണങ്ങളായിരുന്നു ലഭിച്ചത്. ഡയലോഗ് അവതരണം മുതൽ വേഷവും ആക്ഷൻ രംഗങ്ങളും വരെ ചിലർ വിമർശിച്ചിരുന്നു.
യുവതാരങ്ങൾ മുന്നോട്ട് കൊണ്ടുപോയ കഥയുടെ ഭാവം അദ്ദേഹത്തിന്റെ വരവോടെ കുറയുന്നുവെന്ന അഭിപ്രായങ്ങളും ഉയർന്നു.
ഇത്തരത്തിലുള്ള പ്രതികരണങ്ങൾക്ക് പിന്നാലെ ഫെബ്രുവരി 19ന് നെറ്റ്ഫ്ളിക്സിലെത്തിയ പതിപ്പിൽ മമ്മൂട്ടിയുടെ രംഗങ്ങളിൽ മാറ്റം വരുത്തിയതായി സോഷ്യൽ മീഡിയയിൽ ചർച്ചകൾ ശക്തമാണ്.
ചില ഡയലോഗുകൾ വീണ്ടും ഡബ്ബ് ചെയ്തതായും പ്രചരിക്കുന്നു. ഇതുമായി ബന്ധപ്പെട്ട് ഔദ്യോഗിക സ്ഥിരീകരണം ലഭിച്ചിട്ടില്ലെങ്കിലും വിഷയത്തിൽ അനുകൂല-പ്രതികൂല പ്രതികരണങ്ങൾ തുടർന്നുകൊണ്ടിരിക്കുന്നു.
chatha-pacha-ott-version-discussion
Chatha Pacha, Mammootty, Arjun Ashokan, Roshan Mathew, Malayalam Movie, OTT Release, Netflix
