രണ്ടായിരത്തിൻ്റെ നോട്ട് മുതൽ സൗദി റിയാൽ വരെ; കടത്തിണ്ണയിൽ മരിച്ച യാചകന്റെ സഞ്ചികളിൽ ഉണ്ടായിരുന്നത് 4,52,207 രൂപ

രണ്ടായിരത്തിൻ്റെ നോട്ട് മുതൽ സൗദി റിയാൽ വരെ; കടത്തിണ്ണയിൽ മരിച്ച യാചകന്റെ സഞ്ചികളിൽ ഉണ്ടായിരുന്നത് 4,52,207 രൂപ

ചാരുംമൂട് (ആലപ്പുഴ) ∙ സ്കൂട്ടർ ഇടിച്ച് പരിക്കേറ്റ് പിന്നീട് കടത്തിണ്ണയിൽ മരിച്ച നിലയിൽ കണ്ടെത്തിയ യാചകന്റെ സഞ്ചികളിൽ നിന്ന് 4,52,207 രൂപ കണ്ടെത്തി. 

ചാരുംമൂടും പരിസര പ്രദേശങ്ങളും കേന്ദ്രീകരിച്ച് ഭിക്ഷാടനം നടത്തി വന്നിരുന്ന ഇയാൾ തിങ്കളാഴ്ച വൈകുന്നേരമാണ് അപകടത്തിൽപ്പെട്ടത്.

സ്കൂട്ടർ ഇടിച്ച് വീണതിനെ തുടർന്ന് നാട്ടുകാർ ഇയാളെ സമീപത്തെ ആശുപത്രിയിൽ എത്തിച്ചിരുന്നു. 

അനിൽ കിഷോർ, തൈപറമ്പിൽ, കായംകുളം എന്ന വിലാസമാണ് ഇയാൾ ആശുപത്രിയിൽ നൽകിയത്. 

തലക്ക് ഗുരുതരമായി പരിക്കേറ്റതിനാൽ വിദഗ്ദ്ധ ചികിത്സ ആവശ്യമാണെന്ന് ഡോക്ടർമാർ നിർദേശിച്ചെങ്കിലും, രാത്രി ആയതോടെ ഇയാൾ ആശുപത്രി വിട്ടുപോയി.

ചൊവ്വാഴ്ച രാവിലെയാണ് ചാരുംമൂട് ടൗണിലെ ഒരു കടത്തിണ്ണയിൽ ഇയാളെ മരിച്ച നിലയിൽ കണ്ടെത്തിയത്. 

നൂറനാട് പൊലീസ് സ്ഥലത്തെത്തി മൃതദേഹം ആലപ്പുഴ മെഡിക്കൽ കോളേജ് ആശുപത്രിയിലേക്ക് മാറ്റി. 

തുടർന്ന് ഇയാളുടെ കൈവശമുണ്ടായിരുന്ന സഞ്ചികൾ പൊലീസ് സ്റ്റേഷനിലേക്ക് കൊണ്ടുപോയി പരിശോധിച്ചപ്പോഴാണ് വലിയ തുക പണം കണ്ടെത്തിയത്.

സഞ്ചികളിലുണ്ടായിരുന്ന പ്ലാസ്റ്റിക് ടിന്നുകളിലും പഴ്സുകളിലുമായി സൂക്ഷിച്ച നിലയിലായിരുന്നു പണം. 

നോട്ടുകൾ എണ്ണുന്നതിനായി ചാരുംമൂട് പഞ്ചായത്ത് അംഗം ഫിലിപ്പ് ഉമ്മനെയും പൊതുപ്രവർത്തകനായ അരവിന്ദാക്ഷനെയും പൊലീസ് സ്റ്റേഷനിലേക്ക് വിളിച്ചു വരുത്തി. 

എസ്.ഐ രാജേന്ദ്രൻ, എ.എസ്.ഐ രാധാകൃഷ്ണനാചാരി, സി.പി.ഒ മണിലാൽ എന്നിവരുടെ സാന്നിധ്യത്തിലാണ് പണം എണ്ണിയത്.

എണ്ണിയപ്പോൾ 4,52,207 രൂപയുണ്ടെന്ന് സ്ഥിരീകരിച്ചു. 2000 രൂപയുടെ 12 നോട്ടുകളും സൗദി റിയാലുകളും ഇതിൽ ഉൾപ്പെടുന്നു.

 അഞ്ച് പ്ലാസ്റ്റിക് ടിന്നുകളിലായി നോട്ടുകൾ അടുക്കി സെല്ലോടേപ്പ് ഉപയോഗിച്ച് ഒട്ടിച്ച നിലയിലായിരുന്നു സഞ്ചിയിൽ സൂക്ഷിച്ചിരുന്നത്.

ഇതുവരെ ഇയാളുടെ ബന്ധുക്കളാരും എത്തിച്ചേർന്നിട്ടില്ലെന്നും കണ്ടെത്തിയ പണം കോടതിയിൽ ഹാജരാക്കുമെന്നും നൂറനാട് സി.ഐ എസ്. ശ്രീകുമാർ അറിയിച്ചു.

English Summary

A beggar who died after being hit by a scooter in Charummoodu, Alappuzha, was found to be carrying ₹4,52,207 in cash. The man, identified as Anil Kishore of Kayamkulam, had left the hospital against medical advice after sustaining head injuries. His body was later found on a shop verandah. Police recovered the money from bags he was carrying and will produce it before the court, as no relatives have come forward yet.

charummoodu-beggar-death-cash-recovery

Charummoodu, Alappuzha, Beggar Death, Cash Recovery, Road Accident, Kerala Police, Unidentified Relatives