ജയ്പൂര്‍: കാൺപൂരിനു പിന്നാലെ രാജസ്ഥാനില്‍ ട്രെയിന്‍ അട്ടിമറിക്കാന്‍ ശ്രമം. അജ്മീറില്‍ 70 കിലോയുടെ സിമന്റ് കട്ട റെയില്‍വേ ട്രാക്കില്‍ നിന്ന് കണ്ടെത്തി. സര്‍ധാന്‍ ബംഗാര്‍ ഗ്രാമത്തിലാണ് സംഭവം. ഗുഡ്‌സ് ട്രെയിന്‍ പാളം തെറ്റിക്കാനാണ് ശ്രമിച്ചത്.(cement blocks kept on tracks to derail goods train in Ajmer)
ആസൂത്രണത്തിന് പിന്നിൽ ആരാണെന്ന് കണ്ടെത്താനായിട്ടില്ല. പ്രയാഗ്‌രാജില്‍ നിന്ന് ഹരിയാനയിലെ ഭിവനായിലേക്കുള്ള കാളിന്ദി എക്‌സ്പ്രസ് കാണ്‍പൂരിലെ റെയില്‍വേ ട്രാക്കില്‍ സ്ഥാപിച്ചിരുന്ന എല്‍പിജി സിലിണ്ടറില്‍ ഇടിച്ചതിന് പിന്നാലെയാണ് രാജസ്ഥാനില്‍ ഈ സംഭവമുണ്ടായത്. ഇന്നലെ രാവിലെയാണ് കാണ്‍പൂരില്‍ ട്രെയിന്‍ അട്ടിമറിക്കാനുള്ള ശ്രമമുണ്ടായത്.
സംഭവത്തില്‍ പൊലീസ് രണ്ട് പേരെ ചോദ്യം ചെയ്തിരുന്നു. ട്രെയിന്‍ പാളത്തില്‍ നിന്ന് എല്‍പിജി സിലിണ്ടറും പെട്രോള്‍ നിറച്ച കുപ്പിയും തീപ്പെട്ടിയും പൊലീസ് കണ്ടെത്തിയിരുന്നു. ട്രെയിനില്‍ തട്ടി സിലിണ്ടര്‍ പാളത്തില്‍ നിന്ന് തെറിച്ചുവീണതോടെ വലിയ അപകടമാണ് ഒഴിവായത്.
