ആലപ്പുഴ: പെരുന്നാളിന് അറുക്കാനായി എത്തിച്ച പോത്ത് വിരണ്ടോടി. ആലപ്പുഴ അമ്പലപ്പുഴയിലാണ് സംഭവം. കഴിഞ്ഞ ദിവസം രാത്രിയിൽ അമ്പലപ്പുഴ വളഞ്ഞ വഴിയിൽ വെച്ചാണ് പോത്ത് വിരണ്ടോടിയത്.
ചെറിയ പെരുന്നാളിന്‍റെ ഭാഗമായി പോത്തിനെ ഇറച്ചിക്കടയിലെത്തിച്ചതായിരുന്നു. ഈ സമയം ഇറച്ചിക്കടക്ക് മുന്നിലും വളഞ്ഞ വഴി ജംഗ്ഷനിലുമായി നൂറു കണക്കിന് ആളുകളാണ് നിന്നിരുന്നത്. കെട്ടിയിട്ട സിമന്‍റ് കട്ടയുൾപ്പെടെ പൊട്ടിച്ചാണ് പോത്ത് ഓടിയത്.
ഓടുന്നതിനിടെ റോഡിലുണ്ടായിരുന്ന ഒരു ബൈക്ക് പോത്ത് ഇടിച്ചിട്ടു. ഇതോടെ നാട്ടുകാരും പ്രദേശത്തുള്ളവരും ഭയന്ന് ചിതറിയോടി. ഒടുവിൽ മണിക്കൂറുകൾക്കു ശേഷമാണ് പോത്തിനെ പിടികൂടിയായത്.
സമീപത്തെ സർവീസ് സ്റ്റേഷന്‌റെ വാട്ടർ ടാങ്കർ വീണ പോത്തിനെ അറവുശാലയിൽ നിന്നെത്തിയവർ പിടികൂടി കെട്ടിയിട്ടു. കഴിഞ്ഞ ദിവസം തിരുവനന്തപുരം കാട്ടാക്കടയിലും കശാപ്പിന് എത്തിച്ച പോത്ത് വിരണ്ടോടിയിരുന്നു. അഞ്ചുകിലോമീറ്ററോളം ഓടിയ പോത്തിന്റെ ആക്രമണത്തില്‍ വഴിയാത്രക്കാരായ മൂന്നുപേര്‍ക്ക് പരിക്കേറ്റു.
