പത്തനംതിട്ട കിടങ്ങന്നൂരിൽ കനാലില്‍ കാണാതായ വിദ്യാർത്ഥികളുടെ മൃതദേഹങ്ങൾ കണ്ടെത്തി; മരിച്ചത് ഇന്ന് റിപ്പബ്ലിക്ക് ദിന പരേഡിൽ പങ്കെടുക്കേണ്ടിയിരുന്ന എസ്പിസി കേഡറ്റുകൾ

പത്തനംതിട്ട കിടങ്ങന്നൂരിൽ കനാലില്‍ കാണാതായ വിദ്യാർത്ഥികളുടെ മൃതദേഹങ്ങൾ കണ്ടെത്തി. രാവിലെ മുതല്‍ ഫയര്‍ഫോഴ്‌സ് സ്‌കൂബ ടീം ആരംഭിച്ച തിരച്ചിലിൽ ആണ് മൃതദേഹം കണ്ടെത്തിയത്. വിദ്യാര്‍ത്ഥികള്‍ ഇറങ്ങിയ ഭാഗത്ത് തന്നെയായിരുന്നു മൃതദേഹം കിടന്നിരുന്നത്. ഇന്ന് റിപ്പബ്ലിക്ക് ദിന പരേഡിൽ പങ്കെടുക്കേണ്ടിയിരുന്ന എസ്പിസി കേഡറ്റുകളാണ് മരിച്ച കുട്ടികൾ. Bodies of missing students found in canal in Kidangannur, Pathanamthitta

ഇന്നലെ വൈകുന്നേരമായിരുന്നു എസ് വി ജി ഹൈസ്‌ക്കൂളിലെ പത്താം ക്ലാസ് വിദ്യാര്‍ത്ഥികളായ അഭിരാജ്, അനന്ദുനാഥ് എന്നിവരെ കനാലില്‍ കാണാതായത്. ഇന്നലെ, സ്‌കൂളില്‍ സ്റ്റുഡന്റ്‌സ് പൊലീസ് കേഡറ്റിന്റെ ക്ലാസ് ഉണ്ടായിരുന്നു. ഇതിന് ശേഷം ഇരുവരും കൂട്ടുകാരന്റെ വീട്ടില്‍ പോയി.

പിന്നാലെ കിടങ്ങന്നൂരില്‍ മുടിവെട്ടാന്‍ പോകേണ്ടതുണ്ടെന്ന് പറഞ്ഞ ശേഷം ഇരുവരും കൂട്ടുകാരന്റെ വീട്ടില്‍ നിന്ന് പോവുകയായിരുന്നു. കനാല്‍ തീരത്ത് വിദ്യാര്‍ത്ഥികളുടെ ചെരിപ്പും വസ്ത്രങ്ങളും കണ്ടെത്തിയതിനെ തുടര്‍ന്ന് കഴിഞ്ഞ ദിവസം ഫയര്‍ഫോഴ്സ് തിരച്ചില്‍ നടത്തിയിരുന്നുവെങ്കിലും കുട്ടികളെ കണ്ടെത്താനായിരുന്നില്ല.