കല്‍പ്പറ്റ: വയനാട് എംപിയായാല്‍ സുൽത്താൻ ബത്തേരിയുടെ പേര് ഗണപതിവട്ടം എന്നാക്കി പുനർനാമകരണം ചെയ്യുമെന്ന് ബിജെപി സംസ്ഥാന അധ്യക്ഷൻ കെ സുരേന്ദ്രൻ. റിപ്പബ്ലിക് ചാനലിന് നൽകിയ അഭിമുഖത്തിലാണ് വിവാദ പരാമര്‍ശം.
നാല് ദിവസം മുന്‍പാണ് ഈ അഭിമുഖം നല്‍കിയത്. അഭിമുഖത്തിന്റെ അവസാനഭാഗത്തിലാണ് സുരേന്ദ്രന്‍ ഈ പരാമര്‍ശം നടത്തുന്നത്.ബത്തേരിക്ക് ഗണപതിവട്ടം എന്ന് പേര് മാറ്റാന്‍ സാധ്യമാകുമോ എന്ന ആവര്‍ത്തിച്ചുള്ള ചോദ്യത്തിനാണ് സുരേന്ദ്രന്‍ വിശദ മറുപടി നല്‍കുന്നത്.
” സ്വാതന്ത്ര്യ സമരചരിത്രത്തില്‍ വയനാടിനു വലിയ പങ്കുണ്ട്. 1984ൽ പ്രമോദ് മഹാജൻ സുൽത്താൻ ബത്തേരിയിൽ എത്തിയപ്പോൾ ഇത് സുൽത്താൻ ബത്തേരി അല്ലെന്നും ഗണപതിവട്ടം ആണെന്നും പറഞ്ഞിരുന്നു. വിദേശ അധിനിവേശത്തിനെതിരെയും ടിപ്പു സുൽത്താനെതിരെയും ഇവിടെ നിന്ന് പോരാടിയിരുന്നു. ലോക്സഭാ തിരഞ്ഞെടുപ്പ് വിജയിച്ച് എംപിയായാല്‍ ഗണപതിവട്ടം എന്നാക്കി മാറ്റാന്‍ ശ്രമിക്കും. മോദി സർക്കാരിന്റെ സഹായത്തോടെ ഇത് നടപ്പിലാക്കും.”
“ബത്തേരിയുടെ യഥാർഥ പേര് ഗണപതിവട്ടം എന്നാണ്. ടിപ്പു സുൽ‌ത്താന്റെ അധിനിവേശത്തിന് ശേഷമാണ് പേര് മാറ്റിയത്. മലയാളികളെ ആക്രമിച്ചയാളാണ് ടിപ്പു. ഹിന്ദുക്കളെ മതം മാറ്റി മുസ്ലിമാക്കി. പഴശ്ശിരാജയും പോരാളികളും ടിപ്പുവിനെതിരെ പോരാടിയിട്ടുണ്ട്.” – കെ.സുരേന്ദ്രൻ പറയുന്നു.
