കാശ് വാങ്ങിയതിന് കണക്കുണ്ട്, തോന്ന്യാസത്തിന് ആരെയും തുണയ്ക്കില്ല; വെള്ളാപ്പള്ളിക്ക് ബിനോയ് വിശ്വത്തിന്റെ ഒളിയമ്പ്
കട്ടപ്പന: സിപിഐ കാശ് വാങ്ങിയാൽ അതിന് കണക്കും ഉത്തരവാദിത്വവുമുണ്ടെന്നും, പണം വാങ്ങിയതിന്റെ പേരിൽ ആരുടേയും തോന്ന്യാസങ്ങൾക്ക് കൂട്ടുനിൽക്കുന്ന പാർട്ടിയല്ല സിപിഐയെന്നും സംസ്ഥാന സെക്രട്ടറി ബിനോയ് വിശ്വം വ്യക്തമാക്കി.
കട്ടപ്പനയിൽ നടന്ന പാർട്ടി പ്രവർത്തക കൺവൻഷനിൽ സംസാരിക്കുകയായിരുന്നു അദ്ദേഹം.
കഴിഞ്ഞ ലോക്സഭാ തിരഞ്ഞെടുപ്പിന് മുൻപ് വെള്ളാപ്പള്ളി നടേശനെ നേരിട്ട് കണ്ടാണ് പാർട്ടിക്കായി സംഭാവന അഭ്യർത്ഥിച്ചതെന്ന് ബിനോയ് വിശ്വം പറഞ്ഞു.
എത്രയാണ് ആവശ്യപ്പെടുന്നതെന്ന് വെള്ളാപ്പള്ളി ചോദിച്ചപ്പോൾ, തുക നിശ്ചയിച്ചിട്ടില്ലെന്നും, വഴിവിട്ട സഹായങ്ങൾ സിപിഐ സ്വീകരിക്കില്ലെന്നും, കഴിയുന്നത്ര നൽകാനാണ് ആവശ്യപ്പെട്ടതെന്നും അദ്ദേഹം വ്യക്തമാക്കി.
ഒരു ലക്ഷം രൂപ മതിയോ എന്ന് വെള്ളാപ്പള്ളി ചോദിച്ചപ്പോൾ അതിനെക്കുറിച്ച് തർക്കിക്കാതെ വിട്ടുവെന്നും, എന്നാൽ പിന്നീട് മൂന്നു ലക്ഷം രൂപ സംഭാവനയായി നൽകിയതായും ബിനോയ് വിശ്വം പറഞ്ഞു.
“കാശ് വാങ്ങിച്ചിട്ട് മുങ്ങുന്ന പാർട്ടിയല്ല സിപിഐ. വാങ്ങിയ പണത്തിന് കണക്കും ഉത്തരവാദിത്വവുമുണ്ട്.
അതിന് പകരമായി തെറ്റായ കാര്യങ്ങൾ ചെയ്യാനോ ആരെയെങ്കിലും അനാവശ്യമായി പിന്തുണയ്ക്കാനോ പാർട്ടി തയ്യാറാകില്ല,” എന്നും അദ്ദേഹം വ്യക്തമാക്കി.
വെള്ളാപ്പള്ളിയുമായി തർക്കത്തിനില്ലെന്നും, പാർട്ടിക്ക് പൂർത്തിയാക്കേണ്ട ഗൗരവമേറിയ ദൗത്യങ്ങളുണ്ടെന്നും ബിനോയ് വിശ്വം കൂട്ടിച്ചേർത്തു.
പുനർജനിയെക്കുറിച്ചുള്ള വാർത്ത പുറത്തുവന്നതോടെ കോൺഗ്രസിലെ എല്ലാ ഗ്രൂപ്പുകളും ഒന്നിച്ചുവന്നത് അങ്കലാപ്പ് കൊണ്ടാണെന്നും, അന്വേഷണം ഉണ്ടായാൽ ആരൊക്കെ കുടുങ്ങുമെന്ന ഭയമാണിതിന് പിന്നിലെന്നും അദ്ദേഹം ആരോപിച്ചു.
“പേടിയുള്ളവർ ചുറ്റും നിന്നോളൂ” എന്ന പുരാണ കഥാപാത്രത്തെ പോലെയാണ് പ്രതിപക്ഷ നേതാവ് വി.ഡി. സതീഷന്റെ നിലപാടെന്നും, പ്രതിപക്ഷത്തിന് എന്തൊക്കെയോ കാര്യങ്ങളിൽ വലിയ ഭയമുണ്ടെന്ന് ഇതിൽ നിന്ന് വ്യക്തമാകുന്നുവെന്നും ബിനോയ് വിശ്വം പറഞ്ഞു.
മൂന്നാം തുടർച്ചയായ ഭരണവും എൽഡിഎഫിന് ഉറപ്പാണെന്നും അദ്ദേഹം അവകാശപ്പെട്ടു.
English Summary
CPI state secretary Binoy Viswam has stated that the party maintains accountability for funds it receives and will not support anyone’s wrongdoing in return for money. Speaking at a party convention in Kattappana, he revealed that CPI had sought a donation from SNDP leader Vellappally Natesan during the last Lok Sabha elections. While no specific amount was demanded, Vellappally eventually donated ₹3 lakh. Binoy Viswam clarified that CPI neither indulges in unethical support nor disappears after receiving funds. He also took a dig at the Congress over the Punarjani issue, alleging fear within the opposition, and asserted that a third consecutive LDF government is certain.
binoy-viswam-velappally-fund-statement-cpi
Binoy Viswam, CPI, Vellappally Natesan, Kerala Politics, CPI Fund Statement, LDF, Congress, Punarjani Issue
