അധ്യാപകന്റെ പ്രണയാഭ്യർത്ഥന; വിദ്യാർത്ഥിനിയുടെ മറുപടി ചെരിപ്പുകൊണ്ട്

അധ്യാപകന്റെ പ്രണയാഭ്യർത്ഥന; വിദ്യാർത്ഥിനിയുടെ മറുപടി ചെരിപ്പുകൊണ്ട്

ബെംഗളൂരു: ക്ലാസ് മുറിയിൽ വിദ്യാർത്ഥിനിയോട് പ്രണയാഭ്യർത്ഥന നടത്തിയ അധ്യാപകനെതിരെ പ്രതിഷേധം ശക്തമായി. ശ്രീ സിദ്ധാർത്ഥ മെഡിക്കൽ കോളേജിൽ നടന്ന സംഭവത്തിൽ അധ്യാപകനെ വിദ്യാർത്ഥികൾ മർദ്ദിക്കുകയും ദൃശ്യങ്ങൾ സോഷ്യൽ മീഡിയയിൽ വൈറലാകുകയും ചെയ്തു.

പാഠം പഠിപ്പിക്കുന്നതിനിടെ അധ്യാപകൻ തന്റെ “പ്രണയം” തുറന്നുപറഞ്ഞ്, വിദ്യാർത്ഥികളുടെ മുന്നിൽ നിന്ന് ഒരാൾക്ക് നേരിട്ട് “ഐ ലവ് യൂ” പറയുന്നതാണ് വീഡിയോയിൽ കാണുന്നത്. ഇതിനെതിരെ വിദ്യാർത്ഥിനി ശക്തമായി പ്രതികരിക്കുകയും, “ഇത് പ്രിൻസിപ്പലിനോട് അറിയിക്കും” എന്നും വ്യക്തമാക്കുകയും ചെയ്തു.

ഇതിന് പിന്നാലെ ഇരുവരും തമ്മിൽ വാക്കുതർക്കമുണ്ടായി. പിന്നീട് ക്ലാസ് വിട്ട് പോകാൻ ശ്രമിച്ച അധ്യാപകനെ മറ്റ് വിദ്യാർത്ഥികൾ ചേർന്ന് മർദ്ദിച്ചതായാണ് റിപ്പോർട്ട്. മറ്റൊരു ദൃശ്യത്തിൽ വിദ്യാർത്ഥിനി അധ്യാപകനെ ചെരുപ്പുകൊണ്ട് അടിക്കുന്നതും കാണാം.

സംഭവത്തിന് പിന്നാലെ അധ്യാപകൻ സ്ഥലത്തുനിന്ന് രക്ഷപ്പെട്ടതായി വിവരമുണ്ട്. ഇതിനിടെ, അബ്ദുൽ എന്ന അധ്യാപകനെ കോളജ് അധികൃതർ സസ്പെൻഡ് ചെയ്തതായി അറിയിച്ചു. കേസെടുത്ത് അന്വേഷണം പുരോഗമിക്കുകയാണെന്നും അധികൃതർ വ്യക്തമാക്കി.

സംഭവം വിദ്യാഭ്യാസ സ്ഥാപനങ്ങളിലെ അധ്യാപക-വിദ്യാർത്ഥി ബന്ധത്തെക്കുറിച്ചുള്ള ചർച്ചകൾക്ക് വഴിവെച്ചിരിക്കുകയാണ്.

English Summary

A professor in a Bengaluru medical college was allegedly beaten by students after proposing to a female student inside a classroom. The incident, captured on video, shows the professor expressing love during class, leading to confrontation. The college has suspended the accused and initiated an investigation.