കോഴിക്കോട്: മകനും ഭാര്യയും ചേര്‍ന്ന് കുക്കറുകൊണ്ട് വയോധികയെ മർദിച്ചു. കോഴിക്കോട് ബാലുശ്ശേരി കണ്ണാടിപ്പൊയിലിലാണു സംഭവം. നടുക്കണ്ടി സ്വദേശി രതിയാണ് ആക്രമണത്തിന് ഇരയായത്.
മകന്‍ രബിനും മരുമകള്‍ ഐശ്വര്യയും ചേർന്നാണ് രതിയെ കുക്കറിന്റെ മൂടി കൊണ്ട് അടിച്ചു പരുക്കേല്‍പ്പിച്ചത്. ഗുരുതരമായി പരിക്കേറ്റ ഇവരെ കോഴിക്കോട് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.
ഭര്‍ത്താവ് ഭാസ്‌കരനെയും മര്‍ദിച്ചതായി പരാതിയില്‍ പറയുന്നു. സംഭവത്തില്‍ ബാലുശേരി പൊലീസ് എഫ്‌ഐര്‍ രജിസ്റ്റര്‍ ചെയ്ത് അന്വേഷണം ആരംഭിച്ചു.
ഞായറാഴ്ചയാണ് കേസിനാസ്പദമായ സംഭവം. രതിക്ക് മര്‍ദനത്തില്‍ ശരീരാമസകലം പരിക്കേറ്റിട്ടുണ്ട്. സ്വത്ത് എഴുതിത്തരണമെന്ന് ആവശ്യപ്പെട്ടപ്പോള്‍ പറ്റില്ലെന്ന് പറഞ്ഞതിനെ തുടര്‍ന്നാണ് മകനും മരുമകളും ചേര്‍ന്ന് ആക്രമണത്തെ നടത്തിയത്.
