മലയോര പ്രദേശങ്ങളിൽ മഴ ശക്തമായതോടെ ഇടുക്കിയിൽ രാത്രി യാത്രയ്ക്ക് നിരോധനം ഏർപ്പെടുത്തി. രാത്രി 7 മണി മുതൽ രാവിലെ ആറുമണി വരെയാണ് യാത്ര നിരോധനം. ശക്തമായ മഴയ്ക്കും കാറ്റിനും സാധ്യത എന്ന മുന്നറിയിപ്പിനെ തുടർന്ന് ജില്ലയിൽ ഓറഞ്ച് അലേർട്ട് പ്രഖ്യാപിച്ചതിനു പിന്നാലെയാണ് നിരോധനവും ഏർപ്പെടുത്തിയത്. ഇടുക്കിയിലും കോട്ടയത്തും വ്യാപകമായ മഴയിൽ കനത്ത നാശനഷ്ടമാണ് കഴിഞ്ഞ ദിവസങ്ങളിലായി ഉണ്ടായിക്കൊണ്ടിരിക്കുന്നത്. ഇന്നലെ കോട്ടയം ജില്ലയിൽ ഉണ്ടായ ഉരുൾപൊട്ടലിൽ വ്യാപക നാശനഷ്ടം ഉണ്ടായി. ഭരണങ്ങാനം വില്ലേജ് ഇടമറുക് ചൊക്കല്ല് ഭാഗത്താണ് ഉരുൾപൊട്ടൽ ഉണ്ടായത്. ഉരുൾപൊട്ടലിൽ ഏഴു വീടുകൾ തകർന്നു. മണ്ണിടിച്ചിലിൽ നിരവധി മൃഗങ്ങൾ മണ്ണിനുള്ളിൽപ്പെട്ട് ചത്തു. ഈ ജില്ലകളിൽ ശക്തമായ മഴ നാളെയും തുടരുമെന്നാണ് കാലാവസ്ഥാവകുപ്പിന്റെ പ്രവചനം.









