തനിക്ക് പ്രേതബാധയെന്ന് യുവാവ്: ലാൻഡിങ്ങിനിടെ എമർജൻസി വാതിൽ തുറക്കാൻ ശ്രമം; വിമാനം രക്ഷപ്പെട്ടത് തലനാരിഴയ്ക്ക് !

ലാൻഡിങ്ങിനിടെ വിമാനത്തിൽ എമർജൻസി വാതിൽ തുറക്കാൻ ശ്രമം

ബെംഗളൂരുവിൽ നിന്നും വാരണാസിയിലേക്ക് പുറപ്പെട്ട ഇൻഡിഗോ വിമാനത്തിൽ യാത്രക്കാരൻ എമർജൻസി വാതിൽ തുറക്കാൻ ശ്രമിച്ചത് വലിയ പരിഭ്രാന്തിക്ക് കാരണമായി.

വാരണാസിയിലെ ലാൽ ബഹാദൂർ ശാസ്ത്രി അന്താരാഷ്ട്ര വിമാനത്താവളത്തിൽ ലാൻഡ് ചെയ്യാൻ മിനിറ്റുകൾ മാത്രം ബാക്കിനിൽക്കെയാണ് ഈ അപകടകരമായ നീക്കമുണ്ടായത്.

ഉത്തർപ്രദേശിലെ മൗ ജില്ലക്കാരനായ മുഹമ്മദ് അദ്നാൻ എന്ന യാത്രക്കാരനാണ് വിമാനത്തിലെ മറ്റു യാത്രക്കാരുടെ ജീവൻ അപകടത്തിലാക്കുന്ന തരത്തിൽ പെരുമാറിയത്.

വിമാനം നിലത്തിറങ്ങാൻ വെറും 500 അടി മാത്രം ഉയരത്തിൽ നിൽക്കെയായിരുന്നു ഈ സംഭവം.

യാത്ര ആരംഭിച്ച് 15 മിനിറ്റുകൾ പിന്നിട്ടപ്പോൾ തന്നെ അദ്നാൻ എമർജൻസി വാതിലിൽ കൃത്രിമം കാണിക്കാൻ ശ്രമിച്ചിരുന്നു.

വിമാനത്തിലെ ജീവനക്കാർ ഇത് ശ്രദ്ധിക്കുകയും ഇയാൾക്ക് കർശനമായ മുന്നറിയിപ്പ് നൽകുകയും ചെയ്തിരുന്നു.

അബദ്ധം പറ്റിയതാണെന്ന് പറഞ്ഞ് അദ്നാൻ അന്ന് തടിയൂരിയെങ്കിലും ലാൻഡിങ് സമയത്ത് വീണ്ടും പഴയ പടി തുടരുകയായിരുന്നു.

രാത്രി 10:20 ഓടെ വിമാനം ലാൻഡ് ചെയ്യാൻ തുടങ്ങവേ രണ്ടാമതും വാതിൽ തുറക്കാൻ ശ്രമിച്ചതോടെ ക്രൂ അംഗങ്ങൾ ഉടൻ തന്നെ പൈലറ്റിന് ജാഗ്രതാ നിർദ്ദേശം നൽകി.

അപകടസാധ്യത കണക്കിലെടുത്ത് പൈലറ്റ് സന്ദർഭോചിതമായി ഇടപെട്ട് ലാൻഡിങ് ഒഴിവാക്കി വിമാനം വീണ്ടും ഉയർത്തുകയായിരുന്നു.

തുടർന്ന് 10:35 ഓടെ വിമാനം സുരക്ഷിതമായി താഴെയിറക്കിയതോടെയാണ് വിമാനത്തിലുണ്ടായിരുന്ന യാത്രക്കാർക്ക് ശ്വാസം നേരെ വീണത്.

ജീവനക്കാരുടെ കൃത്യസമയത്തുള്ള ഇടപെടൽ വലിയൊരു ദുരന്തമാണ് ഒഴിവാക്കിയത്. വിമാനം സുരക്ഷിതമായി ലാൻഡ് ചെയ്തതിന് പിന്നാലെ യാത്രക്കാർ ജീവനക്കാർക്ക് നന്ദി രേഖപ്പെടുത്തി.

വിമാനം നിലത്തിറങ്ങിയ ഉടൻ തന്നെ അദ്നാനെ എയർലൈൻ സുരക്ഷാ ഉദ്യോഗസ്ഥരും സി.ഐ.എസ്.എഫും ചേർന്ന് കസ്റ്റഡിയിലെടുത്തു.

പോലീസിന്റെ പ്രാഥമിക ചോദ്യം ചെയ്യലിനിടെ തനിക്ക് പ്രേതബാധ ഏറ്റതാണെന്നും അതുകൊണ്ടാണ് ഇങ്ങനെ ചെയ്തതെന്നുമാണ് ഇയാൾ അവകാശപ്പെട്ടത്.

എന്നാൽ പിന്നീട് സ്റ്റേഷനിൽ വെച്ച് നടത്തിയ വിശദമായ ചോദ്യം ചെയ്യലിൽ ഇയാൾ മൊഴി മാറ്റി.

ഗോവയിൽ അവധിക്കാലം ആഘോഷിച്ച് മടങ്ങുകയാണെന്നും താൻ പിടിച്ചു വലിച്ചത് എമർജൻസി വാതിലിന്റെ ഹാൻഡിൽ ആണെന്ന് അറിയില്ലായിരുന്നു എന്നുമാണ് ഇയാൾ പിന്നീട് പറഞ്ഞത്.

സംഭവത്തിൽ അദ്നാനെതിരെ കേസെടുത്ത് പോലീസ് വിശദമായ അന്വേഷണം ആരംഭിച്ചിട്ടുണ്ട്. പ്രതിയെ നിലവിൽ പോലീസ് ചോദ്യം ചെയ്തു വരികയാണ്.

മൗ ജില്ലയിലുള്ള ഇയാളുടെ കുടുംബത്തെ പോലീസ് വിവരം അറിയിച്ചിട്ടുണ്ട്. അവർ വാരണാസിയിലേക്ക് എത്തിക്കൊണ്ടിരിക്കുകയാണെന്ന് പോലീസ് ഉദ്യോഗസ്ഥർ വ്യക്തമാക്കി.

വിമാനയാത്രയ്ക്കിടെയുള്ള സുരക്ഷാ മാനദണ്ഡങ്ങൾ ലംഘിച്ചതിനും യാത്രക്കാരുടെ ജീവന് ഭീഷണി ഉയർത്തിയതിനുമാണ് ഇയാൾക്കെതിരെ നടപടിയെടുക്കുന്നത്.

യാത്രക്കാരുടെ ഇത്തരം അവിവേകപൂർണ്ണമായ പ്രവർത്തികൾ വ്യോമയാന മേഖലയിൽ വലിയ ആശങ്കയാണ് ഉണ്ടാക്കുന്നത്.

ലാൻഡിങ് പോലുള്ള അതീവ ജാഗ്രത വേണ്ട സമയങ്ങളിൽ ഉണ്ടാകുന്ന ഇത്തരം ഇടപെടലുകൾ വിമാനത്തിന്റെ ബാലൻസിനെ ബാധിക്കാനും വൻ അപകടങ്ങൾക്കും കാരണമായേക്കാം.

വിമാനത്തിനുള്ളിലെ സുരക്ഷാ നിർദ്ദേശങ്ങൾ യാത്രക്കാർ കർശനമായി പാലിക്കേണ്ടതിന്റെ ആവശ്യകതയിലേക്കാണ് ഈ സംഭവം വിരൽ ചൂണ്ടുന്നത്.