പന്തളം: പന്തളം കൊട്ടാരത്തിലെ കുടുംബാംഗം കൈപ്പുഴ ലക്ഷ്മിവിലാസം കൊട്ടാരത്തിൽ തിരുവോണം നാൾ അംബ തമ്പുരാട്ടി അന്തരിച്ചു. 87 വയസ്സായിരുന്നു. സംസ്‌കാരം തിങ്കളാഴ്ച 11.30ന് തൃശൂർ പാറമേക്കാവ് ശാന്തിഘട്ടിൽ നടക്കും.
പരേതരായ പൂയം നാൾ മംഗലത്തമ്പുരാട്ടിയുടെയും കുമ്മനം കരുവേലിൽ ഇല്ലത്ത് ദേവദത്തൻ നമ്പൂതിരിയുടെയും മകളാണ് അംബ തമ്പുരാട്ടി. കുന്നംകുളം ചിറളയം കൊട്ടാരത്തിൽ പരേതനായ മുരളീധര രാജയാണ് ഭർത്താവ്.
മക്കൾ : രാജേഷ് വർമ (റിട്ട. ഉദ്യോഗസ്ഥൻ, സ്റ്റേറ്റ് ബാങ്ക് ഓഫ് ഇന്ത്യ), രമേഷ് വർമ (ജോയിന്റ് സെക്രട്ടറി, പന്തളം കൊട്ടാരം നിർവാഹക സംഘം), ബ്രിജേഷ് വർമ (ചെന്നൈ). മരുമക്കൾ : ശ്രീകല (സൗത്ത് ഇന്ത്യൻ ബാങ്ക്, തൃശൂർ എംജി റോഡ് ശാഖ), ശ്രീജ (നവോദയ സ്‌കൂൾ, നേര്യമംഗലം), സുരഭി.
അംബ തമ്പുരാട്ടിയുടെ അന്ത്യത്തെ തുടർന്ന് പന്തളം വലിയ കോയിക്കൽ ധർമശാസ്താ ക്ഷേത്രം ഏപ്രിൽ 16 വരെ അടച്ചിടും. 17ന് രാവിലെ ശുദ്ധിക്രിയകൾക്ക് ശേഷമേ നട തുറക്കുകയുള്ളു. ഏപ്രിൽ 14ന് വലിയകോയിക്കൽ ധർമശാസ്താ ക്ഷേത്രത്തിൽ നടത്താനിരുന്ന വിഷു ഉത്സവവും തിരുവാഭരണച്ചാർത്തും ഉണ്ടാകില്ല.
