കൊച്ചി: സിനിമാ സെറ്റിൽ വച്ച് പ്രമുഖ നടനില്നിന്ന് മോശം അനുഭവമുണ്ടായെന്ന നടി വിന്സി അലോഷ്യസിന്റെ വെളിപ്പെടുത്തൽ ഇൻസ്റ്റാഗ്രാമിൽ സ്റ്റോറിയാക്കി നടൻ ഷൈൻ ടോം ചാക്കോ. വിഷയത്തിൽ നടൻറെ പേര് വെളിപ്പെടുത്തി വിൻസി പരാതി നൽകിയിരുന്നു. ഹോട്ടലിൽ ഡാൻസാഫ് സംഘം പരിശോധന നടത്തുന്നതിന് മുൻപാണ് നടൻ സ്റ്റോറി പങ്കുവച്ചത്.
നടിയുടെ വെളിപ്പെടുത്തൽ സംബന്ധിച്ച വാർത്തയുടെ പോസ്റ്ററാണ് നടൻ സ്റ്റോറിയാക്കിയത്. ഇത് ഇപ്പോഴും ഷൈന്റെ ഇൻസ്റ്റഗ്രാം അക്കൗണ്ടിലുണ്ട്. വിൻസിയുടെ വെളിപ്പെടുത്തൽ വൻ വിവാദമായതിനു പിന്നാലെ ഷൈനെതിരെ ഫിലിം ചേംബറിലും സിനിമയുടെ ഐസിസിക്കും ആണ് പരാതി നൽകി നൽകിയത്.
‘സൂത്രവാക്യം’ സിനിമയുടെ സെറ്റിൽ വച്ചാണ് നടൻ മോശമായി പെരുമാറിയതെന്ന് നടിയുടെ പരാതിയിൽ പറയുന്നു. സിനിമ ചിത്രീകരണത്തിനിടെ ലഹരി ഉപയോഗിച്ച നടൻ തന്നോട് മോശമായി പെരുമാറിയെന്നായിരുന്നു വിൻസിയുടെ വെളിപ്പെടുത്തൽ. ലഹരി ഉപയോഗിക്കുന്നവർക്കൊപ്പം ഇനി അഭിനയിക്കില്ലെന്നും വിൻസി പറഞ്ഞിരുന്നു.
ഡാൻസാഫ് സംഘത്തിന്റെ പരിശോധന നടക്കവേയാണ് നടൻ ഷൈൻ ടോം ചാക്കോ ഹോട്ടലിൽ നിന്ന് ഇറങ്ങിയോടിയത്. ബുധനാഴ്ച രാത്രി 11 മണിക്ക് എറണാകുളം നോർത്തിലെ സ്വകാര്യ ഹോട്ടലിൽ നിന്നാണ് നടൻ ഇറങ്ങിയോടിയത്.
