ഹോണലൂലു: ഡോ.കിൽഡെയർ, ഷോഗൺ തുടങ്ങിയ ലോക പ്രശസ്ത സീരീസുകളിലൂടെ പ്രസിദ്ധനായ നടൻ റിച്ചാർഡ് ചേമ്പർലെയ്ൻ അന്തരിച്ചു. 90 വയസ്സായിരുന്നു. പക്ഷാഘാതവുമായി ബന്ധപ്പെട്ട ആരോഗ്യപ്രശ്നങ്ങളെത്തുടർന്ന് ഹവായിലെ വൈമനാലോയിൽ വെച്ചാണ് അന്ത്യം സംഭവിച്ചത്.
ഷോഗൺസ ദ തോൺ ബേഡ്സ് തുടങ്ങിയ പരമ്പരകളിലെ വേഷങ്ങളിലൂടെ മിനി സീരീസുകളുടെ രാജാവ് എന്ന വിശേഷണം അദ്ദേഹം നേടിയിട്ടുണ്ട്. 1961-ൽ പുറത്തിറങ്ങിയ ഡോ. കിൽഡെയർ എന്ന ചിത്രത്തിലെ ഡോ. ജെയിംസ് കിൽഡെയർ എന്ന കഥാപാത്രമാണ് അദ്ദേഹത്തെ സുപരിചിതനാക്കിയത്.
ഷോഗൺ എന്ന പരമ്പരയിലെ ജയിൽപ്പുള്ളിയുടേയും ദ തോൺ ബേഡ്സിലെ കത്തോലിക് പുരോഹിതന്റെയും വേഷങ്ങൾ ചേമ്പർലെയ്നിന്റെ ജീവിതത്തിലെ നാഴികക്കല്ലുകളാണ്.1983-ലെ 60 ശതമാനം യുഎസ് ടെലിവിഷൻ പുരസ്കാരങ്ങളും ദ തോൺ ബേഡ്സ് നേടി. 16 എമ്മി നാമനിർദേശങ്ങളും തോൺ ബേഡ്സിന് ലഭിച്ചിരുന്നു.
2003-ൽ, 70-ാം വയസിൽ താൻ ഹോമോ സെക്ഷ്വലാണെന്ന ചേമ്പർലെയ്നിന്റെ തുറന്നുപറച്ചിൽ ഏറെ വാർത്താ പ്രാധാന്യം നേടിയിരുന്നു. 2003-ൽ പുറത്തിറങ്ങിയ ഷാറ്റേഡ് ലവ് എന്ന ആത്മകഥയിലായിരുന്നു നടൻ ഇക്കാര്യം പറഞ്ഞത്.
