ബാങ്ക് വിളിക്കിടെ ഉച്ചത്തിൽ ഭക്തിഗാനം വച്ചുവെന്ന് ആരോപിച്ച് കടയുടമയ്ക്ക് മർദ്ദനം. ബെംഗളൂരു അൾസൂർഗേറ്റിലെ നാഗർട്പേട്ടിലാണ് സംഭവം. സംഭവത്തിൻ്റെ വീഡിയോ സോഷ്യൽ മീഡിയയിൽ പ്രചരിക്കുന്നുണ്ട്. ഒരു സംഘം ആളുകൾ കടയിലേക്ക് വരുന്നതും എന്തോ പറയുന്നതും വിഡിയോയിൽ കാണാം. ഇവരിൽ ഒരാൾ കടയുടമയുടെ കോളറിൽ പിടിക്കുന്നുണ്ട്. കടയുടമ കൈ തട്ടിമാറ്റിയ ഉടൻ മറ്റൊരാൾ ഇയാളുടെ മുഖത്തടിക്കുന്നതും വീഡിയോയിൽ കാണാം.
ബാങ്ക് സമയത്ത് കടയിൽ ഹനുമാൻ ഗാനങ്ങൾ വെച്ചതിനാണ് ഒരു സംഘം യുവാക്കൾ തന്നെ മർദിച്ചതെന്ന് കടയുടമ മുകേഷ് പറയുന്നത്. “കടയിൽ ഹനുമാൻ ഭക്തി ഗാനങ്ങൾ വെച്ചിട്ടുണ്ടായിരുന്നു. അഞ്ച് പേർ അടങ്ങുന്ന സംഘം കടയിലേക്ക് വന്ന് ബാങ്ക് സമയമാണെന്നും പാട്ട് നിർത്തിയില്ലെങ്കിൽ തല്ലുമെന്നും ഭീഷണിപ്പെടുത്തി”- കടയുടമ പറഞ്ഞതായി ‘ഇന്ത്യ ടുഡേ’ റിപ്പോർട്ട് ചെയ്തു. അഞ്ചംഗ സംഘമാണ് ആക്രമണത്തിന് പിന്നിൽ. മൂന്ന് പേരെ അറസ്റ്റ് ചെയ്തിട്ടുണ്ട്. ബാക്കിയുള്ളവരെ കണ്ടെത്താൻ പൊലീസ് അന്വേഷം ആരംഭിച്ചിട്ടുണ്ടെന്നും ‘ഇന്ത്യ ടുഡേ’ റിപ്പോർട്ട് ചെയ്യുന്നു.
