തിരുവനന്തപുരം: കഴിഞ്ഞ ദിവസം റിലീസായ പൃഥ്വിരാജ്- മോഹൻലാൽ ചിത്രം എമ്പുരാൻ പ്രദർശനത്തിനിടയിൽ തീയറ്ററുകളിൽ വ്യാപക പണിമുടക്ക്. തിരുവനന്തപുരത്തും കൊച്ചിയിലുമാണ് സംഭവം. എസി പണി മുടക്കിയതോടെ തിയേറ്റർ അധികൃതർ ഫ്രീ ഷോ നടത്തി.
കാട്ടാക്കട തൂങ്ങാൻപാറയിൽ പ്രവർത്തിക്കുന്ന തിയേറ്ററിലാണ് എസി തകരാറിലായത്. എമ്പുരാൻ ഷോ നടക്കുന്നതിനിടയിലായിരുന്നു സംഭവം. ഇതോടെ പടം കാണാനെത്തിയവർ പ്രതിഷേധവുമായി രംഗത്തെത്തി. പിന്നാലെ തിയേറ്ററിൽ കൂക്കുവിളിയും കയ്യാങ്കളിയുമായി ആരംഭിച്ചു.
ബഹളത്തിനൊടുവിൽ ടിക്കറ്റ് തുക തിരികെ നൽകിയാണ് തിയേറ്റർ ഉടമകൾ പ്രശ്നം പരിഹരിച്ചത്. തുക കൈപ്പറ്റിയവർ ഭൂരിഭാഗവും എസി ഇല്ലാതെ സിനിമ പൂർണമായും കണ്ടാണ് മടങ്ങിയത്.
അതേസമയം എറണാകുളം സെന്റർ സ്ക്വയർ മാളിലും പ്രദർശനത്തിനിടെ സാങ്കേതിക തകരാർ നേരിട്ടു. ചിത്രം ശബ്ദമില്ലാതെയാണ് പ്രദർശിപ്പിച്ചത്. സിനിമ നിർത്തി വെച്ച് വീണ്ടും പ്രദർശിപ്പിച്ചപ്പോഴും സമാന സംഭവം തുടർന്നു. പിന്നാലെ കാണികൾ തീയറ്ററിന് പുറത്ത് ഇറങ്ങുകയായിരുന്നു.
