അബുദാബി: വാക്കും പെരുമാറ്റവും അതിരുവിട്ടാൽ പ്രവാസലോകത്ത് വലിയ വില നൽകേണ്ടി വരുമെന്ന് വീണ്ടും ഓർമ്മിപ്പിച്ച് അബുദാബി കോടതി.
ഒരു സ്ത്രീയെ വാക്കുകൾ കൊണ്ട് അപമാനിക്കുകയും മാനസികമായി തളർത്തുകയും ചെയ്ത മറ്റൊരു സ്ത്രീക്ക് 10,000 ദിർഹം (ഏകദേശം രണ്ടര ലക്ഷത്തോളം ഇന്ത്യൻ രൂപ) കോടതി പിഴ ചുമത്തി.
പരാതിക്കാരിയുടെ അന്തസ്സിനെ ചോദ്യം ചെയ്യുന്ന രീതിയിലുള്ള പരാമർശങ്ങൾ നടത്തിയതിനാണ് ഈ കടുത്ത നടപടി.
അപകീർത്തികരമായ പരാമർശങ്ങളും പരാതിക്കാരിയുടെ നിയമപോരാട്ടവും
തന്റെ അന്തസ്സിനും സൽപ്പേരിനും കളങ്കമുണ്ടാക്കുന്ന രീതിയിലുള്ള അധിക്ഷേപങ്ങൾ പ്രതിയിൽ നിന്ന് ഉണ്ടായെന്ന് ചൂണ്ടിക്കാട്ടിയാണ് യുവതി കോടതിയെ സമീപിച്ചത്.
വാക്കുകൾ മൂലമുണ്ടായ മാനസിക വിഷമത്തിനും വൈകാരിക തളർച്ചയ്ക്കും പരിഹാരമായി 25,000 ദിർഹം നഷ്ടപരിഹാരവും കേസ് നടത്താൻ ചെലവായ തുകയും പ്രതിയിൽ നിന്ന് ഈടാക്കി നൽകണമെന്ന് പരാതിക്കാരി ആവശ്യപ്പെട്ടു.
അപകീർത്തികരമായ പരാമർശങ്ങൾ വ്യക്തിജീവിതത്തെയും സന്തോഷത്തെയും ബാധിച്ചുവെന്ന് ഇവർ കോടതിയിൽ ബോധിപ്പിച്ചു.
ക്രിമിനൽ കോടതി ശിക്ഷയ്ക്ക് പിന്നാലെ സിവിൽ കോടതിയുടെ ഇരുട്ടടി
ഈ സംഭവത്തിൽ നേരത്തെ നടന്ന ക്രിമിനൽ കേസിൽ പ്രതി കുറ്റക്കാരിയാണെന്ന് കണ്ടെത്തുകയും 3,000 ദിർഹം പിഴ ശിക്ഷ വിധിക്കുകയും ചെയ്തിരുന്നു.
ക്രിമിനൽ കോടതിയുടെ വിധി അന്തിമമാണെന്ന് തെളിയിക്കുന്ന സർട്ടിഫിക്കറ്റുകൾ പരാതിക്കാരി അബുദാബി ഫാമിലി, സിവിൽ, അഡ്മിനിസ്ട്രേറ്റീവ് ക്ലെയിംസ് കോടതിയിൽ ഹാജരാക്കി.
ക്രിമിനൽ കേസിൽ ശിക്ഷിക്കപ്പെട്ടത് സിവിൽ കോടതിയിൽ പരാതിക്കാരിയുടെ വാദങ്ങൾക്ക് കരുത്തുപകർന്നു.
സിവിൽ കേസ് തള്ളിക്കളയണമെന്ന് പ്രതിഭാഗം ആവശ്യപ്പെട്ടെങ്കിലും കോടതി അത് നിരാകരിക്കുകയായിരുന്നു.
വന്ദേ ഭാരത് സ്ലീപ്പർ ട്രെയിൻ യാഥാർത്ഥ്യമാകുന്നു; പ്രധാനമന്ത്രി നരേന്ദ്ര മോദി നാളെ പച്ചക്കൊടി വീശും
മറ്റൊരാളെ മാനസികമായി തകർക്കുന്നത് ഗുരുതരമായ കുറ്റമെന്ന് കോടതി
യുഎഇയിലെ സിവിൽ നിയമങ്ങളെ ഉദ്ധരിച്ചുകൊണ്ടാണ് കോടതി വിധി പ്രസ്താവിച്ചത്. മറ്റൊരാൾക്ക് ശാരീരികമായോ മാനസികമായോ ദോഷം വരുത്തുന്ന ഏതൊരു വ്യക്തിയും ആ പ്രവൃത്തിക്ക് നഷ്ടപരിഹാരം നൽകാൻ ബാധ്യസ്ഥനാണെന്ന് കോടതി വ്യക്തമാക്കി.
പ്രതിയുടെ അധിക്ഷേപം പരാതിക്കാരിയിൽ വലിയ തോതിലുള്ള മാനസിക വേദനയും ദുരിതവും ഉണ്ടാക്കിയെന്ന് കോടതി നിരീക്ഷിച്ചു.
അന്തസ്സോടെ ജീവിക്കാനുള്ള ഒരാളുടെ അവകാശത്തെ ചോദ്യം ചെയ്യുന്ന നടപടിയാണിതെന്നും കോടതി വിലയിരുത്തി.
നഷ്ടപരിഹാരത്തിന് പുറമെ കോടതി ചെലവുകളും പ്രതി വഹിക്കണം
പരാതിക്കാരിയുടെ ഭാഗത്തുണ്ടായ മാനസികാഘാതം കണക്കിലെടുത്ത് 10,000 ദിർഹം നഷ്ടപരിഹാരം നൽകാൻ കോടതി ഉത്തരവിട്ടു.
ഇതിന് പുറമെ കേസ് ഫയൽ ചെയ്തതിനും നിയമപരമായ നടപടികൾക്കും ഉണ്ടായ മുഴുവൻ ചെലവുകളും പ്രതി തന്നെ വഹിക്കണം.
അനാവശ്യമായ വാക്പോരുകളും അധിക്ഷേപങ്ങളും വലിയ നിയമക്കുരുക്കുകളിലേക്ക് നയിക്കുമെന്നതിന്റെ വ്യക്തമായ മുന്നറിയിപ്പായി ഈ വിധി മാറി.
English Summary
An Abu Dhabi court has set a precedent by ordering a woman to pay AED 10,000 in compensation to another woman for verbal abuse. The court found that the defendant’s insulting words caused significant psychological distress and social defamation. The victim had filed a civil lawsuit following a prior criminal court conviction where the defendant was fined AED 3,000. Under UAE civil law, anyone causing harm to another is liable for compensation, and the court ruled that the victim’s emotional suffering deserved financial restitution.
