കുഞ്ഞുമാലാഖയ്ക്ക് പ്രണാമം; ആലിൻ ഷെറിന് പ്രേംനസീർ സുഹൃത് സമിതിയുടെ ‘ഓർമ്മച്ചെപ്പ്’ സമർപ്പിച്ചു
മല്ലപ്പള്ളി: ദുഃഖം തളംകെട്ടി നിൽക്കുന്ന മല്ലപ്പള്ളിയിലെ ആലിൻ ഭവനത്തിൽ വീണ്ടും ഒരു സ്മരണാമുഹൂർത്തം.
ഒമ്പത് മാസം പ്രായത്തിൽ തന്നെ സംസ്ഥാനത്തെ ഏറ്റവും പ്രായം കുറഞ്ഞ അവയവദാതാവായി മാറിയ ആലിൻ ഷെറിൻ എബ്രഹാമിന്റെ ഓർമ്മയ്ക്ക് പ്രണാമമായി പ്രേംനസീർ സുഹൃത് സമിതി ‘ഓർമ്മചെപ്പ്’ സമർപ്പിച്ചു.
ചെറിയ കുസൃതികളുമായി അമ്മയുടെ മടിയിൽ ഇരുന്നു ചിരിച്ചിരുന്ന ആലിൻ, കുറച്ച് നാളുകൾ മാത്രമെങ്കിലും കുടുംബത്തിനും സമൂഹത്തിനും സന്തോഷം പകരുകയായിരുന്നു.
അപ്രതീക്ഷിതമായി സംഭവിച്ച ദുരന്തം ആ കുടുംബത്തെയും നാടിനെയും വേദനയിലാഴ്ത്തിയപ്പോൾ, അവയവദാനത്തിലൂടെ മറ്റുള്ളവർക്ക് ജീവൻ നൽകിയാണ് ആ കുഞ്ഞ് ഓർമ്മകളിൽ നിലനിൽക്കുന്നത്.
ചലച്ചിത്ര താരം പ്രേംകുമാർ ആലിന്റെ മാതാപിതാക്കളായ അരുൺ എബ്രഹാം, ഷെറിൻ എന്നിവർക്ക് ഓർമ്മചെപ്പ് കൈമാറി. പ്രേംനസീർ സുഹൃത് സമിതി പ്രസിഡന്റ് പനച്ചമൂട് ഷാജഹാൻ അധ്യക്ഷത വഹിച്ചു. സെക്രട്ടറി തെക്കൻ സ്റ്റാർ ബാദുഷ ആമുഖപ്രസംഗം നടത്തി.
സമിതി ഭാരവാഹികളായ ആര്യനാട് സന്തോഷ്, വിനയചന്ദ്രൻ നായർ, റെജി സാമുവൽ, അഡ്വ. ഹൻ സലാഹ്, കെ.ഇ. അബ്ദുൾ റഹ്മാൻ, ബഷീർ കുട്ടി, മല്ലപ്പള്ളി അൻസാരി തുടങ്ങിയവർ ചടങ്ങിൽ പങ്കെടുത്തു.
English Summary
A memorial tribute was held in Mallappally in memory of Aalin Sherin Abraham, the youngest organ donor in the state at just nine months old. The Prem Nazir Suhruth Samithi presented a commemorative memento to her parents, Arun Abraham and Sherin, with actor Premkumar handing it over. The event honored the infant’s life and her life-saving organ donation, which continues to inspire many.
aalin-sherin-abraham-memorial-organ-donor-tribute
Aalin Sherin Abraham, Organ Donation, Mallappally News, Memorial Tribute, Kerala News, Prem Nazir Suhruth Samithi
